Къабарты-Малкъарда оналты жангы школ ишленеди

Арт беш жылны ичинде Къабарты-Малкъарда алты жангы школ ишленнгенди. Бюгюнлюкде уа «Билим бериу» миллет проектни чеклеринде республикада оналты мектепни къурулушу къыстау бардырылады. Аладан жетисини къурулушу 2022 жылда башланнганды эм быйылгъы жылны ахырына хайырланыргъа берилликди. Андан сора да юсюбюздеги жылны башында тогъуз мектепни къурулушу башланнганды, аланы келир жылны аягъына ишлеп бошарыкъдыла.

Алай бла, 2025 жылгъа бек аздан 14 минг жангы окъуу жерле къураллыкъдыла. 

Белгилерчады, жангы окъуу учрежденияла терк ишлеген интернетге къошуллукъдула, аланы кабинетлеринде шёндюгюлю компьютер оборудование эм окъутууну тийишлисича бардырыргъа онгла къураллыкъдыла. Жыйылыула бардырылыучу эм спорт бла кюреширге жарарыкъ залла, аш ашаучу эм солуу жерле, физкультура эм спорт майданла шёндюгюлю излемлеге келиширикдиле.

Билим бериу бёлюмде жангырытыу ишлени тийишлисича бардырыу окъутуу ишни игилендирлигине эм качествосун да кётюрлюгюне, сабийлени уа мектепледе туруулары хычыуун боллугъуна сёз да жокъду, деп билдиргендиле республиканы оноучусуну пресс-службасындан.   

Поделиться: