Болушлукъну сезедиле

«Единая Россия» политика партия жыл сайын бардырыучу «Сабийни школгъа хазырла» деген акцияны чеклеринде бу кюннге къыралда элли беш минг къызчыкъ бла жашчыкъ болушлукъ тапхандыла.
Партияны башламчылыгъы бла тёрт мингден артыкъ пункт къуралгъан эди. Ары ыразылыгъы болгъан ким да школ кереклени, спорт форманы, карандаш, къалам, дефтер дегенча затланы келтирирге боллукъ эдиле. Школ формаланы сабийлеге бериу а партияны регион бёлюмлеринде жамауат болушлукъну штабларында, приемныйлеринде болдурулады. Жангы регионлада уа ол иш гуманитар болушлукъ этген сетьлени, партияны толтуруучу комитетлерини эмда «Ридовка Помогает!» деген пунктларыны юсю бла бардырылады.

Болушлукъну 55 минг сабий алгъанды, муратлары уа битеу да 200 минг сабийге себеплик этиудю. Энчи эс бусагъатда Украинада бара тургъан энчи аскер операциягъа къатышханланы сабийлерине бурулады, алагъа бусагъатда бютюн аслам болушлукъ керекди. жамауат штаблада тюрлю-тюрлю ишле къурап, алада сабийлеге окъуу жылны аллында саугъала бередиле. Анда дагъыда заявка къоюп, адрес болушлукъ алыргъа да онг барды, деп хапарлагъанды партияны толтуруучу ара комитетини башчысы Александр Сидякин. Хар элни, шахарны да кесини энчиликлери бардыла, аны себепли акция хар жерде да энчиленип бардырылады. Бек алгъа юйюрде ненча сабий болгъаныны, алагъа не затла бек кереклисини юсюнден билдириу жыйышдырылады, анга кёре болушлукъ да этиледи, деп ангылатады Сидякин. Андан сора да, ол чертгеннге кёре, жангы регионлада партия мектеплени ишлеуге да болушады.

КъМР-де «Единая Россия» политика партияны жамауат приёмныйини регион бёлюмюню башчысыны орунбасары Хасанби Абазов билдиргеннге кёре, республиканы битеу онюч жер-жерли бёлюмлеринде да «Единая Россия», тёреде болуучусуча, «Сабийни мектепге барырына болуш» деген акт бла жандауурлукъ акция бардырылады. Нальчикде ол регионну жамауат бёлюмюню приёмныйини майданында къуралгъанды. Акцияны кезиуюнде партияны келечилери кёп сабийли юйюрледен, къарыусуз, къолайсыз юйюрледен сабийлени мектеплеге хазырларгъа тири болушадыла. Чертип айтыргъа тийишли кёреме, быйыл аллай болушлукъ бек биринчи СВО-гъа къатышхан аскерчилени сабийлерине эс бурулады. Бу ишге Къабарты-Малкъарны атындан Къырал Думада депутатла, дагъыда республиканы Федерация Советде келечилери да бек тири къатышханларын да белгилеп айтыргъа керекди. Кеслерини тийишли юлюшлерин республиканы парламентинде Единая Россия политика партияны атындан депутатла эмда жер-жерли самоуправление советлени келечилери да бир жанында къалмагъандыла.

«Бу кюннге партактив хазырлап, жангы регионланы билим берген учрежденияларына 200 комплект школ керекле хазырлап, жибергендиле. Жыйырма бир комплект а КъМР-ни школларында окъугъан сабийлеге берилгенди. Иш андан ары бардырылады. Ыразылыгъы болгъан ким да пунктха къолундан келген затланы алып келтирирге боллукъду», - дегенди Хасанби Абазов.