Кырдыкны кюйдюрюу адамланы жашауларына къоркъуулуду

Кюнню къызыулугъу бла байламлы эм адам улуну эссизлиги бла байламлы, от ёчюлтюучюлеге суткагъа 10 кереден аслам чыгъаргъа тюшеди чакъырыулагъа. Асламында къургъакъ кырдык жанады. Аны баш сылтауу уа адамла атып кетген тютюнден неда суу бла ёчюлтмей къойгъан жаннган отдады.

Аз желчик ургъанлай, кырдык терк окъуна къабынып къалады. Андан а от адамла жашагъан, ишлеген жерлеге дери жетерге болады. Аны бла бирге уа ачыгъанла да тюбейдиле.

Бюгюнюлюкде Къабарты-Малкъарда агъачха барып от этиуге чек салыныпды. Аны бузгъанлагъа тазир салынырыкъды эм ала административ жууаплыкъгъа тартыллыкъдыла.

Алай бла къургъакъ хансны кюйдюрюп, къоркъуусузлукъгъа заран салгъанла административ жууаплылыкъгъа тартыладыла.  Дагъыда ала тазир тёлерге да борчлу боллукъдула. Гражданлагъа ол 10-20 минг сомду. Организацияланы бла предприятияланы таматаларына - 30-60 минг, энчи предпринимательлеге тазирни ёлчеми  60-80 мингнге жетеди. Юридический организацияла уа 400-800 минг сом тёлерге борчлу боллукъдула аманлыкъ ишлери тохташдырылса.

КъМР-ни От тюшюуге къажау -къутхарыу службасы гражданладан эсли болургъа, сабийлени къолларына сирнеклени бермезге, жерде мияла кесеклени  къоймазларын, агъач къурулушланы тийрелеринде от этмезлерин тилейди. Битеу бу саналгъан затладан хата чыгъып къалады.