Гулидовну мемориалындан – тёрт майдал

Красноярскда Иван Ярыгинни атын жюрютген спорт арада дзюдодан алтын эм тюрсюнлю темирле жарашдыргъан заводну директору Владимир Гулидовну хурметине аталгъан «А» класслы тёрели эришиу къуралгъанды. Анда саугъала ючюн 14 ауурлукъ къауумда къыралны 18 регионундан, Беларусьдан бла Таджикистандан 130-дан аслам спортчу тутушхандыла.

Бизни республикадан анда кюмюш майдалланы Байсыланы Таулан бла Мухамед Алоев къытхандыла. Таулан алтын майдал ючюн сермешде къошакъ заман берилгенден сора Москвадан Давид Карапетянны чабылыуун ычхындыргъанды. Мухамед а, тёрт сермешинде хорлап, ахырында Беларусьдан Егор Труханнга хорлатханды.

«Доммакъла» къоллу уа Бетал Чегемов бла Цийкъанланы Ислам болгъандыла.