Жолла мардалагъа келиширча

Бу кюнледе «Къоркъуусуз эм качестволу автомобиль жолла» миллет проектге кёре,  Элбрус районда алты километр чакълы бирде юч жолгъа  тынгылы ремонт этилликди. Бюгюнлюкде  жангыртыу ишле  Элбрус, Огъары Бахсан элледе эм Жантуугъан альплагерьге баргъан жоллада барадыла. Аны чеклеринде  жолланы мурдорларын  кючлерикдиле, бордюрла саллыкъдыла, темир къоркъуусузлукъну жалчытырча темир буруула тартыллыкъдыла эм асфальт саллыкъдыла.   Бусагъатда сагъынылгъан жумушаны иги кесиги этилгенди. Ол себепден жууукъ заманда объектле хазыр боллукъдула.

Сагъынылыгъан проектни чеклеринде Зольск районда   Каменномостскоеде  Куважоковланы орамында эм  Хабазда  Ленин орамлагъа, саулай алып айтханда, 11,5 километр чакълы бирде  тынгылы ремонт ишле барадыла.  Ара орамлада  эки школ,  амбулатория эм межгит орналадыла.

Бусагъатда подряд организацияны келечилери жолланы мурдорларын хазырлап кюрешедиле, ол санда мурдорланы кючлейдиле,  жауун суу саркъырча арыкъла, быргъыла саладыла. Бир-бир жерледе  тийишли жумушланы бошап, биринчи къат асфальт салып башлагъандыла.

Къоркъуусузлукгъа да аслам буруллукъду. Темир буруула, жорукъну билдирген ызла тартыллыкъдыла, «зебрала» эм башха белгиле да салынырыкъдыла.  

Миллет проектге кёре, Нальчик шахар округда  да бу кюнледе Къабарты, Осетин, Калмыков, Шогенов,   Нахушев, Мазлоев, Руставели, Мовсисян,  Пятигорская орамлада, саулай алып айтханда, 13 километр чакълы бирде  тынгылы ремонт ишле барадыла. Аны чеклеринде,   жолланы, тротуарланы тапландыргъандан сора да,  инженер инфраструктураны жангыртырыкъдыла эм тёгерек-башны  жашиллендирирча мадар этилликди. Проектге кёре объектле быйылны ахырына битерге керекдиле. 

Бусагъатда Калмыков атлы орамда подряд организацияны келечилери жолну эм тротуарны да мурдорларын хазырлап, бордюрла салып  бошап,  бир-бир  жерледе биринчи къат асфальт жайып башлагъандыла. Мостоваядан  Будай улу орамгъа дери  участок да къыстау  жангыртылады. Ол санда   кече жарытырча мадар да этиледи.   Мовсисян орамда эки километр чакълы бирде игилендириу ишле  барадыла.  Жолчула экинчи къат асфальт салып эм  чыракълы чыпынланы жарашдырып бошай турадыла.  Саулай алып айтханда, мында 17 сантиметр чакълы юч къат асфальт эм жорукъну билдирген белгиле да  салынырыкъдыла.

Аслам транспорт жюрюген жолланы биринде Осетни орамда да  тынгылы ремонт ишле эртте башланнгандыла.  Бусагъатда подряд организацияны келечилери инженер коммуникацияланы тартып, жолну мурдорун кючлеп кюрешедиле. Объектни жангыртыуда жангы технологияла эм качестволу материалла   хайырланыладыла. Сёз ючюн, ток баргъан чыбыкъланы алышханларындана сора да, аланы быргъыланы ичине сугъадыла. Алай бла «Таза кёк» проектге кёре, шахарны бетин бузмазча  объектде чыбыкъланы бири къалмай жер тюбюне кетерилликдиле. Тротуарланы жангыртырыкъдыла, кече жарыкъ болурча, тёгерек-башны жашиллендирирча  мадарда  этилликди.

Темир жолну аллында омакъ сквер а жерлешлерибизни эм къонакъланы да къууандырлыкъды, ара межгитни аллеясы да   жангыртыллыкъды, былайда  машинала сюелирча жерле къураллыкъдыла эм башха шартлагъа да  эс буруллукъду. Шахарчыла иги жанына тюрлениулеге бек бюсюрегенлерин да энчи белгилеп айтырчады.

Къырал контрактлагъа тийишлиликде, сагъынылгъан объектле быйыл кюз артындан  кеч къалмай битерге керекдиле.