Усталыгъын къадарыны саугъасына санайды

Жылны аллындан башлап, биз газетибизде  ахшы устазланы бла юйретиучюлени юслеринден  аслам жазабыз. Бу усталыкъны сайлагъанлагъа къачан да халкъда уллу хурмет этилгенди. Мени бюгюннгю ушакъ нёгерим Мокъаланы Фатиманы  уа эсинде жокъ эди къадар аны артха, туугъан эли Бабугентни школуна, келтирир деп. Нек дегенде  10 классны бошагъандан сора, ол башха усталыкъны сайлап, аны бла ишлер муратлы эди. Алай жашау, бир-бирде биз суннган жолдан тайдырып, башха ыз бла элтеди. Фатима Мухадиновнаны къадары анга юлгюдю.

– Мен  устаз болургъа аз да мурат этмегенме. Бу ишге тохташханлы алай кёп болмайды. Башланнган класслада дерсле бардыргъанлы 10 жыл болады. Ары дери алада ана тилден окъутуп тургъанма. Бу жолгъу класс  ючюнчюмдю. Школгъа 2001 жылда лаборант болуп келгенме, –дейди ушакъ нёгерим.

Устаз сабийлени сюймесе, школда ишлеялмазлыгъына мен толу ийнанама. Ушакъ нёгерим да аны алайлыгъына тюшюннгенди. Ол гитчелени бегирек сюеди эм ол себепден башланнган класслада ишлерге энчи ыразылыкъ бла тохташханды. Бюгюнлюкде аны  окъуучуларыны араларында бир юйюрден ючюнчюсю келгенле  да бардыла. Фатима Мухадиновна  аллай къысха заманны ичинде окъуна сабийле  башхаракъла болгъанларын айтады. Аланы хар къаууму да бютюн гиртчи бола барадыла. Билим алыргъа хазырла жылны ичинде ачыкъланадыла.

– Биринчи классха келгенле бла бир тил таба билиу бек магъаналыды. Урушсанг да, жумушакъ халда этерге  керексе. Сабийни жюрегин сындырмазгъа, окъуудан кёлюн къачырмазгъа сакъ болургъа керекди, – дейди устаз.

Озгъан окъуу жылда Бабугентде кёпден бери сакъланнган бир ахшы шарт  болгъанды. Ол да неди десегиз, биринчи классладан тамам ючюсю къуралгъан эди. Аланы хар биринде да 20-дан  артыкъ сабий барды.  Ушакъ нёгерим да бу шартха бек къууанады. Аны сылтауун ол жаш къауум эртте юйюрленип эм бек аздан 4-5 сабий ёсдюрюрге къоркъмагъанларында кёреди.

– Сёз ючюн, бир жыл алгъа алып къарасакъ,  1-чи классха 13 сабий келген эди. Бу быйылгъы къауумда уа- бек аздан  60 сабий. Ма быйыл сентябрьде эки класс боллукъду, ол да къууандырады, – дейди Фатима Мухадиновна.

Устаз бла биз кемчиликлени юслеринден да сёлешгенбиз. Аладан бек уллусу уа бюгюнлюкде, барыбыз да билгенден, ана тилибиз бла байламлыды. Ол чертгеннге кёре, сёлешген да, окъугъан да къыйын этедиле ёз тилибизде сабийле.

– Мени классымда жыйырмадан артыкъ сабийден кесибизча къыйналмай жаланда экиси сёлешедиле. Кёбюсю айтханымы окъуна ангыламайдыла. Ол мени бек къыйнайды. Жарсыугъа, ата-анала кеслерине тынчлыкъгъа гитчеликден телефонланы къолларына тутдуруп къоядыла. Сабийни эсинде уа ол хаманда не затны эшитип турса, ол къалады. Аны барыбыз да билебиз. Дерсде окъусала, сёлешселе да тыш миллетли адамлача чалдырадыла. Жюрегим къыйналады бу болумгъа. Школда ана тилден дерсле да бек аздыла. Аланы да асламыракъ салсала бек сюерик эдим, – дейди устаз.

. Мокъаланы Фатима белгилегенича, сабий бир ыйыкъны ичинде дерсге келмесе, ол алгъан билимин да тас этип къояды. Ол а тилни ёчюлюуюне себеп болуп барады. 

 Жангы окъуу жылны ушакъ нёгерим ашыгъып сакълайды. Нек дегенде сабийлеге бек тансыкъ болады. Жашауун жангыдан къурар онг берилсе да, ол аны болгъаныча школ эм окъуучула бла байларыгъына уа бир такъыйкъагъа да ишекли тюйюлдю.