Архыздан жетишим бла къайтхандыла

Къабарты-Малкъар къырал университетни юч студент къаууму «СКФО-ну социал-экономика айныуу-2023» кейс-чемпионатда жетишимли болгъандыла. Ол а Шимал-Кавказ федерал университетни эмда «Кавказ. РФ» корпорацияны башламчылыкълары бла бардырылгъанды.

Къарачай-Черкесге Шимал Кавказны окъуу юйлеринден 24 жыйымдыкъ къауум эмда эришиуге энчи халда къатышхан тёрт  адам келгендиле. КъМКъУ-дан а ары право, экономика эмда финансла институтну «Хурметлиле» атлы къаууму, менеджмент, туризм эмда къонакъбайлыкъны индустриясы институтну «Тауланы бойсундургъанла» деген эмда «Тауланы сабийлери» атлы командалары баргъандыла. Алагъа уа Байсолтанланы Лейла бла Залина Гергова башчылыкъ этгендиле. Бизни окъуу юйден проектни координатору уа экономика эмда эсеплеу-информация системала кафедраны доценти Гузийланы Лейля болгъанды.

Чемпионат тёрт бёлюмге юлешинип бардырылгъанды – «Туризмни экосистемасы эмда къонакъбайлыкъны индустриясы», «Технологиялы предпринимательликни экосистемасы», «Тийрелени бойсундуруу», «Энергетикалы комплексни инфраструктурасы». «Хурметлиле» атлы къауум экинчи бёлюмге къатышханды. Алагъа жангы технологияла хайырланылгъан бизнесни къурап  эмда аны ишлетиу жаны бла проект жарашдырыргъа керек болгъанды. Анда  жашла бла къызла Сбербанкга жангы продуктну къурауну, башхача айтханда уа, жер-жерли башламчылыкълагъа ырысхы жаны бла себеплик этерик майданны жарашдырыуну юсюнден айтхандыла.

«Тауланы бойсундургъанла» бла «Тауланы сабийлери» атлы къауумла уа туризм эмда къонакъбайлыкъ бла байламлы бёлюмге къатышхандыла экиси да. Ала уа Ингушетия Республиканы Джейрах районунда туризмни къалай айнытыргъа  боллугъуну юсюнден проект хазырларгъа керек эдиле. Жаш адамла уа районда навигациясы, билдириулери бла стендлери эмда треккинг-паутинасы болгъан ара къонакъ юй комплексни къурау жаны бла проектни юлгюге кёргюзтгендиле.

Чемпионатны ахыр урумуна уа сегиз проект чыкъгъанды. Аланы санында уа КъМКъУ-ну студентлерини проектлери да болгъандыла. Къаты эришиуню кезиуюнде «Тауланы сабийлери» къауум «Туризмни бла къонакъбайлыкъны  экосистемалары» бёлюмде  биринчи жерге тийишли болгъандыла эмда бу ызда чемпионлагъа саналгъандыла. «Хурметлиле» команда уа «Технологиялы предпринимательликни экосистемасы» кесегинде экинчи оруннга чыкъгъанды.

Сёз ючюн, менеджмент, туризм эмда къонакъбайлыкъны индустриясы институтну студенти, эришиуге «Тауланы бойсундургъанланы» санында къатышхан Чыгырланы Аслан чемпионатны жаратханын, эксперт къауумла эмда спикерле бла тюбешиуле сейир, кёп затха тюшюндюргенле болгъанларын, андан ары да айныуну ызларына юйретгенлерин айтханды.

Байсолтанланы Лейля уа эришиуню къурагъанлагъа эмда  бардыргъанлагъа ыразылыгъын  билдире, жаш адамла анга къатыша, сынам, билим да алгъанларын, ол билимлерин а ала усталыкъларында хайырланаллыкъларын да чертгенди. Быллай чемпионатла ахшы тёреге айланып, жыл сайын да бардырылырларына ышана, алагъа дагъыда къатышыргъа хазырлыкъларын билдиргенди. «Туризмни эмда къонакъбайлыкъ индустрияны экосистемасы» бёлюмню экспертлерини бийик усталыкъ даражаларын, ала кеслерини ишлерин тынгылы бардыргъанларын да билдиргенди.