Фатарла къайда учуздула

Ингушетия  бла Къабарты-Малкъар, «Домклик» сервисни тинтиулерине кёре, жангы юйледе бек учуз фатарлары болгъан юч регионну санына киргендиле.

Тинтиулени бардыргъанла «Сберни» июньда  жашау журтланы сатыу-алыу ишлерин сюзюп, тергеп, фатарла бек учуз багъала бла сатылгъан регионланы тохташдыргъандыла. Ол тизмени бек башында Ингушетия Республикады. Анда жангы юйледе бир квадрат метрни багъасы 33 800 сомдан башланады.

Къабарты-Малкъар экинчи жердеди. Мында «квадратны» багъасы 47 000 сомдан башланады. Тизме Саратов область бла бошалады. Анда жашау журтланы бир квадрат метри 51 100 сомдан тергеледи.

Тенглешдирир ючюн:  Москвада жангы юйледе бир квадрат метрни багъасы 173 минг сомду, Санкт-Петербургда – 136,6 минг сом, деп билдиреди ТАСС.

Дунияны бек иги вузларындан бириди

Британияны бийик билим бериуде жангылыкъланы эмда башха хапарланы басмалагъан  Times Higher Education журналы  быйыл дунияны жангы эмда  айныр онглары уллу болгъан университетлени тизмесине 1973 жылдан сора ачылгъан 605 вузну къошханды. Аланы санына Шимал-Кавказ федерал университет биринчи кере тюшгенди.

- Федерал университет аллай даражагъа алимлерибиз тинтиулени тири бардыргъанлары, халкъла аралы келишимлерибиз кёпден-кёп бола баргъаны, бизни  жетишимлерибизни юслеринден хапарла басмада терк-терк чыкъгъанлары эмда башха магъаналы кёрюмдюлери ючюн жетгенди. Университетни  окъутуу эмда усталыкъ бериу амаллары, аланы ишге сингдириу эмда вузну бошагъанлагъа урунуу рынокда сурам уллу болгъаны да анга былай бийик багъа берилгенине себеплик этгенлерине ишексизме, - дегенди СКФУ-ну ректору Дмитрий Беспалов.

СКФУ  Шимал Кавказда бек уллу окъуу юйледен бирине саналады, Россейде университетлени тизмесинде  РФ-ни Президентинде Халкъ мюлкню бла къырал къуллукъну россейли академиясы эмда И.И.Мечников атлы Шимал-Восток къырал медицина университет бла бирге ючюнчю жерни алады.