Эл ипотеканы-тынч амал бла

Россейни Правительствосу «Эл ипотека» къырал программаны излемлерин тюрлендиргенди. Алай бла энди аны чеклеринде инсан алты миллион сомгъа дери алыргъа боллукъду. Кесин да юч процент тёлеу бла. Бу халда ахча жаланда элледе юй сатып алыргъа (неда ишлерге) бериледи. Программа Москвада бла Москва областьда, сора дагъыда Санкт-Петербургда ишлемейди ансы, къалгъан регионланы барында да бардырылады.

Алгъын кезиуде бу кредитни мардасы юч миллион сом бла чеклене эди. Узакъдагъы Востокда, Ленинград областьда эмда Ямал-Ненецк автоном округда уа – беш миллион сом бла.

Энди уа ахчаны жаланда юй сатып алыргъа угъай, ишлерге окъуна алыргъа боллукъду. Анга деп хазыр жашау журтну сюерге жараулу материалла эмда керекле сатыладыла.

Алгъын кезиуде бу программа жаланда адам саны отуз мингден озмагъан элледе ишлей эди. Энди уа быллай ипотекагъа 50 мингнге дери адам жашагъан тийреледе, кёп фатарлы (бешден артыкъ болмагъан) юйледе жашау журт алыргъа жарайды. Аллай тийрелеге талай излемлеге келишген элле саналадыла. Аны юсюнден https://www.garant.ru/products/ipo/prime/doc/405920097/ сайтда окъургъа боллукъду. Аланы тизмесин хар регионда да жер-жерли администрацияла жарашдырадыла.

Къалгъан излемле уа алгъынча аллайдыла: кредитни болжалы 25 жыл бла чекленеди, биринчи тёлеую уа юйню багъасыны ондан бирин тутады. Бу жумушда ана капиталны да хайырланыргъа жарайды.

«Эл ипотека» программаны заманы чекленмейди. Алай аны жаланда бир кере боллукъду хайырланыргъа.