Къулакълары эшитмегенчиклеге болушлукъну къурагъандыла

Быйылдан башлап, Къабарты-Малкъарда сакъатланы «Сангырауланы спорт федерациялары» жамауат биригиулери  «Къулакълары эшитмеген сабийни мектепге дери инклюзиялы билим бериуде жыйымдыкъ реабилитациялауда шёндюгюлю технологияла» деген проектни жашауда бардырып тебирегенди. Сагъынылгъан проект а социал жашугъа тири къатышхан коммерциялы болмагъан биригиулени арасында КъМР-ни Миллетлени эмда жамауат проектлени ишлери жаны бла министерствосуну жанындан субсидиягъа да тийишли болгъанды.

Бизни республикада бу проект жашауда бардырылып тебирегинчи уа къулакъларында кохлеарный имплантлары болгъан сабийле школгъа дери билим бериу жаны бла реабилитациялау бла жалчытылынмагъандыла. Аланы ата-аналарына жашчыкъланы бла къызчыкъланы гитчеликлеринден окъуна энчи специалистлеге жюрютюп турургъа тюшгенди

Проектни жашауда бардыргъанла уа аны башчысы Нальчикде отуз жетинчи номерли сабий садны таматасы Лариса Писарева, логопед Мария Водогрецкая, психолог Светлана Пшилова, сурдопедагог Арина Буранова, дефектолог Асият Дадова, тамата юйретиучю эмда методист Эльмира Гаужаевадыла. Иш а сагъынылгъан садикни мурдорунда бардырылады. Мында къулакъларында кохлеарный имплантлары неда тауушну иги эшитдирирча аппаратлары болгъан сабийчикле сагъынылгъан хунерлери болгъан устазла бла энчи, къауумлада бирси жашчыкъла-къызчыкъла бла бирге да юйренирге онг табадыла.

Алты айны ичинде сабий садда мектепге дери инклюзиялы билим бериу эмда коррекциялы-айнытыу болушлукъ жаны бла программа да жашауда бардырылып, мында жетеуленнге сагъынылгъан болушлукъ этилликди. Проектни чеклеринде башланнган иш а отуз жетинчи номерли садикде андан ары бардырыллыкъды. Ол кесини ишин тохтатса уа, сабий садны башчысы шёндюгюлю программалы оборудованияны эмда дидактикалы материалланы, ала уа грантны болушлугъу бла сатылып алыннгандыла, гитчелеге андан ары реабилитацияны эталлыкъ башха махкемеге саугъагъа берирге хазыр болгъанын да билдиргенди.