Шёндюгю чакъырыулагъа къажау сюелиуню амалларын сюзгендиле

Кёп болмай Шимал Осетияны ара шахарында асламлы информация органлада ишлегенлеге деп экинчи халкъла аралы медиафорум  бардырылгъанды. Владикавказгъа, Шимал Кавказны регионларындан сора да,  Москвадан, Владивостокдан, Белоруссиядан, Армениядан эм  Къыбыла Осетиядан да келечиле келген эдиле.   Журналистле битеу ишлерин шахарны  опера эмда театр мекямында  бардыргъандыла. Медиафорумгъа республикадан «Адыгэ псалъэ» эм «Заман» газетлени баш редакторлары Заур Жилясов бла Къонакъланы Хасан, «Кабардино- Балкарская правда» газетни редактору Вероника Васина эм «Эльбрус» китап басманы таматасы Руслан Ацканов къатышхандыла. Ала ары келгенлени тюрлю-тюрлю майданлада бардырылгъан тюбешиуледе республикада чыгъарылгъан  басма продукция бла шагъырейлендиргендиле.

 Форумда сюзюлген баш темаладан бири  - шёндюгю шартла эмда жалгъан хапарлагъа къажау кюреш болгъанды. Дагъыда анда заманны излемлерине келишген билдириуню къалай жарашдырыргъа кереклисине, телепрограммаланы жангы тюрлюлерин къурау, газетлени мындан ары айнытыу жолларын излеу деген темалагъа къарагъандыла.                                   Журналистлени араларында бу магъаналы тюбешиулени къураргъа эм сагъынылгъан темаланы  тынгылы сюзерге Шимал Осетия Республиканы Башчысы Сергей Меняйло уллу къошумчулукъ этгенин эм ол ишге да тири къатышханын белгилерчады.

 -Шёндю биз иги ангылайбыз керти хапарны халкъ асламлагъа заманында жетдиргенни магъанасын. Аны бла бирге асламлы информация органлада ишлегенлени араларында байламлыкъ эм ушакъ тохтамагъанлай бардырылып турургъа кереклисин да. Сизни къолугъузда уллу «сауут» барды, газет бетлеригизде, социал сетьледе   адамлагъа керти хапарны болгъаныча заманында жетдирирге кюрешесиз.   Тюрлю-тюрлю жерледен инсанла алгъан хапарланы ичинде къайсы керти, къайсы ётюрюк болгъанын айыра билирча этиу-ма олду бизни баш борчубуз. Шёндюгю болумлада  адамланы юйретирге керекбиз, акъны  къарадан   айырыргъа»,- дегенди Меняйло, форумну ачылгъан  кезиуюнде сёлеше.

Эки кюнню ичинде баргъан форумну майданларына къараргъа Шимал Осетяны правительствосуну таматасы Борис Джанаев да келген эди. Ол алагъа къарап чыкъгъандан сора, асламлы информация органлада, пресс-службалада ишлегенлени жууаплылыкълары бюгюнлюкде уллу болгъанын чертгенди. «Сиз алда барасыз, ол себепден тынч тюйюлдю ишигиз. Ма аны бла байламлы энчи аскер операция бардырылгъан жерледен адамлагъа керти хапарла керекдиле. Сизге ала ийнанырла, арагъызда байламлыкъ да къуралыр деп, бек ышанама, дегенди ол.

Форумну кезиуюнде тюрлю-тюрлю майданлада семинарла да бардырылгъандыла. Республиканы  делегациясы «Газетлени ишлерин шёндюгю заманнга келишдирип бардырыу» деген семинаргъа къатышханды. Сёзсюз, анда бек алгъа сёз басманы шёндюгю заманда магъанасыны юсюнден баргъанды.  Бир бирге къажау сюелген кезиуде газетле нени юсюнден жазаргъа керекдиле, болумгъа кёре  ишлерин къалай къурасала тапды, деген темала да сюзюлгендиле. Дагъыда  тюбешиуге келгенле бир кибик газетлени тиражлары жылдан-жылгъа тюше баргъанларын жашырмай айтхандыла. Аны бла бирге газетлени электрон амалларын айнытыргъа эмда социал сетьледе телеграмм-каналланы ачып, къыйматлы ишлеге кереклисин белгилегендиле.

 Андан сора бизни республикадан баргъан келечиле Къырал Думаны депутаты, «Россия 1» телеканалны  «60 такъыйкъа» бериуюн  бардырыучу белгили журналист Евгений  Поповну мастер-классына  къатышхандыла. Ол арт кезиуде социал сетьледе дуния бла бир жалгъан хапарла жайылгъанлары себепли, федерал асламлы информация органлада ишлегенлеге къыйын тюшгенин айтханды. «Шартланы билдирген журналистика артха кете барады, аны орунуна тюрлю-тюрлю оюмлары болгъан жанр чыгъады», -дегенди ол. Попов регионлада чыкъгъан басма адамлагъа жууукъ болгъанын да чертгенди. Энчи аскер операция бла байламлы жайылгъан жалгъан хапарланы юсюнден айта, шёндюгюле хар билдириуге тынгылы къарайдыла, аны къайдан чыкъгъанын излейдиле. Къырал  басмада ишлегенлеге  эм блогерлеге билдириулени тинтип, аланы андан ары алай хайырланыргъа кереклисин чертгенди.

 Андан сора да, медиафорумда спикерле болуп РФ-ни Журналистле союзуну секретары Роман Серебряный, ТАСС-ны пресс-арасыны таматасы Николай Яковлев, «Санкт-Петербург» телеканалны директору Александр Малькевич, «Минск-Новости» информация агентствону таматасы Андрей Кривошеев эм башха экспертле сёлешгендиле.

 Форумну ахырында журналистлени араларында 9 номинацияда бардырылгъан конкурсну эсеплери чыгъарылгъандыла. Аланы араларында энчи жерни «Ата журтну къоруулачула: тюнене, бюгюн, хар заманда» деген тема алгъанды. Медиафорумну   битеу хорлагъанлагъа сыйлы саугъала бергендиле.