Борчларын тёлерге ашыкъмайдыла

Быйыл жылны биринчи жарымында  «Россети Северный Кавказ» - «Каббалкэнерго» биригиу кёп заманны ичинде  борчларын жапмагъан   58,7 минг абонентни  токну хайырланмазча чек салыргъа оноу этгенди.  Саулай алып айтханда, аланы 1,35 миллиард сом берликлери бар эди.

Алай бла  ток ызладан  кесилирге къоркъуу чыкъгъанда, 57,3 минги  1,3 миллиард сом тёлеп къутулгъандыла.   Къалгъан  1,4 минг хайырланыучу уа уллу кёллюлюк этгенлери ючюн, башха амал къалмай, ток чыбыкъларын кесерге тюшгендиле.  Саулай алып айтханда, алыны  13,5 миллион сом берликлери барды.

Эсге сала айтсакъ,  законодательствогъа кёре,  борчну тёлерча  энчи арбазлагъа -  30 эм придприятиялагъа 10 кюн бериледи.  Болсада сагъынылгъан кезиуде аны къайгъысын этмеген  абонентге  токну хайырланмазча чек  салынады.  Ызы бла ол  ЛЭП-гъа къошулурча толусунлай  борчун жабаргъа эм   тийишли ишле ючюн да компанияны келечилерине  ахча  тёлерге керек боллукъду.

Энчи арбазла жууаплыдыла

 Кёп болмай «Россети Северный Кавказ» биригиу чыгъаргъан эсеплеге кёре,  энчи арбазла   хайырланнган ток ючюн 788 миллион сом   тёлегендиле.  Ол этилген борчну  97 процентин  тутады. 

Ток бла жалчытхан биригиуню  районлада келечилери  дайым   абонентле бла тири ангылатыу иш бардыргъанлай турадыла. Ол себепден хайырланнган ток ючюн замынында ахча  бергенлени  тизмесине да   къошула барады.

Ол санда  Нальчик бла  Черек  районда жашагъанла ток ючюн борчларын  99 процентге жапхандыла. Ючюнчю жерни уа 97 процент бла  Чегем район алады. Эм осал кёрюмдю  Терк райондады, болсада мында да ол 94 процентге жетеди. 

Ток бла жалчытхан биригиуню баш борчу  районлада  тёлеулени жюз процентге жетдириргеди. Ол шарт заманында тёлегенлени качестволу халда  электрокюч бла жалчытыргъа   онг тапдырады. 

Уллу кёллюлени саны азайгъанды

«Россети Северный Кавказ» - «Каббалкэнерго» биригиуню эсеплерине кёре, быйыл алты айгъа ток ючюн абонентлени  87 проценти  2,8 миллиард сом тёлегендиле.   Былтыр бу заман бла тенглешдиргенде, ол эки процентге кёпдю.

Энергетикле абонентлени бар тюрлюсю бла тири ишлейдиле, ангылатыу иш бардырадыла. Аны себеплиги бла сагъынылгъан кезиуде республикалы эм жер-жерли бюджетледен ахча тёленнген учрежденияла  борчларын  107  эм 103 процентге жапхандыла.  Федерал бюджет  организацияла – 91, эл мюлк предприятияла -  100, промышленный эм аллай болмагъанла - 101 эм  96 эм энчи арбазла   97 процентге.

Бирси заманладача эжашау журт-коммунал мюлк предприятияла кёп берликлери болгъанланы тизмесине киредиле. Быйыл ала тёлеулерин  жаланда 33  процентин жабалгъандыла.   Ток бла жалчытхан биригиу дау бла аладан ахчасын алырча тюрлю-тюрлю амалланы хайырланыр ючюн къалмайды.