Аскер кийимле бла жалчытыугъа танг къошумчулукъ этеди

Быйылны биринчи жарымыны баш  экономика кёрюмдюлери чыгъарылгъандыла. Алай бла республикалы  бюджетни кеси файдалары былтырны бу кезиуюнден эсе  14 процентге ёсгендиле. Халкъны файдасы биринчи  юч айда 4,5 процентге аслам болгъандыла. Августда бюджет организациялада ишлегенлени хакълары, 2021-2022 жылладача, 10 процентге кётюрюллюкдю.

Эсепге тюшген ишсизлени саны да 43 процентге азайгъанды. Бюгюнлюкде ала 5,5 мингнге жетедиле. Аны бла  бирге гитче эмда орта предпринимательлик бла кюрешгенлени, къол усталыкъларына кёре кеслерине иш къурагъанланы санына къошула барады. Бюгюнлюкде ала 20647 эмда 65139 боладыла.  Бу бёлюмде 106 мингден аслам адам урунады.
«Адамларыбызны файдаларын кётюрюуге, ишсизлени санын азайтыугъа Президентибиз Владимир Владимирович Путинни башламчылыгъы бла жарашдырылгъан миллет проектле уллу себеплик этгендиле. Аланы толтуруу жаны бла республика къыралда экинчи жерни алады, СКФО-да уа биринчиди»,- деп билдиргенди КъМР-ни Башчысы кёп болмай РФ-ни Президентини Шимал-Кавказ федерал округда толу эркинликли келечиси Юрий Чайка бла бардырылгъан кенгешде.

Миллет проектлеге бизни  республикадан битеу да 270 проект киреди. Быйыл 19 уллу мекям, ол санда 7 школ бла поликлиника хайырланыргъа берилликдиле.

Къабарты-Малкъарда кийимле тикген «ВоенТекстильПром»  предприятие къыралны къоруулау заказларын толтуруугъа къатышады. Анда Россей Федерацияны Къоруулау министерствосуна, МЧС-ге эмда башха ведомстволагъа кийимле, ырысхы керекле да тигедиле. 

Предприятияны жери  сегиз минг квадрат метрден асламды. Аны кийимле тикген беш цехи, сынау, басмалау, бичген, хазырлагъан, накъышлагъан эмда башха бёлюмлери бардыла. Кеси да шёндюгю оборудование бла жалчытылыныпды. Аны тийресинде ашхана, медпункт да орналыпдыла. Ишчилеге хакъсыз ашатадыла, медицина  болушлукъ  алыр онгла да бередиле.

«ВоенТекстильПромну»  бёлюмлери дагъыда Бахсанда бла Залукокоажеде бардыла. Алада минг чакълы адам ишлейди.

Болушлукъну кючлер муратда                  

Мобилизация бла аскерге чакъырылгъанлагъа региондан бир кере тёленнген ахча болушлукъ бериле турады. Къазауатха бизни республикадан баргъан жашла бла байламлыкъ жюрютюледи, алагъа керекли болушлукъ да этиледи. Битеу да гуманитар жюкден 300 тонна, энчи техника керекле, къыйын жерледен ётерге боллукъ автомобильледен 30-дан асламы берилгендиле.

Донецк бла Луганск халкъ республикалагъа, Херсон областьха да гуманитар жюкден 500 тонна жиберилгенди. Ары уа биринчи керек болгъан затла, ашарыкъла, суу, кийимле, сабий аш-азыкъ эм башха керекле киредиле.  «Бу ишни биз баш борчларыбыздан бирине санайбыз»,- дегенди Казбек Коков кёп болмай кенгешледен биринде.

Ата журтну къоруулаучуларыны къайгъысын кёре

Энчи аскер  операциягъа къатышханлагъа себеплик этиу жаны бла «Ата журтну къоруулаучулары» къырал фондну Къабарты-Малкъарда бёлюмюню ишини биринчи эсеплери чыгъарылгъандыла. 

Къырал фондну регион бёлюмюню таматасы Муаед Дадов билдиргеннге кёре, бир айгъа энчи аскер операциягъа къатышханладан бла аланы юйюрлеринден алагъа 135 тилек берилгенди. Ала социал болушлукъ, аскер къаугъаланы ветераны деген ат алыу, юридический, психология, медицина жаны бла да себеплик этиу, санатор-курорт багъыу, коммунал жарсыула бла байламлыдыла. 120 тилекге кёре мадарла этилгендиле, 15-сине да къарала турады. Бир тилекге, бир тарыгъыугъа  да эс бурулмай къалмайды. Аланы дайым тинтиу не болушлукъ керек болгъанын тохташдырыргъа онг береди.

КъМР-ни Башчысы Казбек Коков фондну Россейни Президенти Владимир Путинни указы бла къуралгъан бёлюмю ишин къалай бардыргъанына дайым кёз-къулакъ болгъанлай турады. Анга деп 1000 квадрат метрни тутхан мекям бёлюннгенди,  эки айны ичинде тынгылы ремонт этилгенди, аны бёлюмлери районлада да ачылгъандыла. Быйылны ахырына дери  бёлюмге ишлерге  80 адамны алыргъа белгиленеди, аладан 23-сю энчи курсладан ётгендиле эмда районлада ишлеп турадыла.

Юсюпланы Галина хазырлагъанды.
Поделиться: