Университетде энчи фонд къураргъа оноулашхандыла

Къабарты-Малкъар къырал аграр университетни попечительство советини кёп болмай жыйылыуу ётгенди. Ректор Аслан Апажев вузну ишини юсюнден хапарлагъанды, юйретиу, социал иш эмда жаш тёлю политика жаны бла проректор Ауес Кумыков а юйретиу жаны бла анда не зат этилгенин билдиргенди. Ызы бла узакъ болжаллы умутла, проектле эмда инновациялы жумушла бёлюмню башчысы Мадина Маржохова КъМКъАУ-ну айнытыугъа ахча мажаргъан Эндаумент-фонд къураргъа оноу этилгенин билдиргенди.

Айтханына кёре, бу фонд КъМКъАУ-гъа билеклик этерге сюйгенледен ахча жыйыу бла кюреширикди, ызы бла аны оноу этиу компаниягъа кёчюрлюкдю. Ол а аны университетни айнытыу жумушлагъа къоратырыкъды. Энчи капитал вузну билим бериу рынокда онгларын кючлендирирге, окъууну, илму-излем ишлени качествосун игилендирирге, тыш компанияла эмда партнёрла бла узакъ болжаллы байламлыкъла жюрютюрге, аграр вузланы арасында алчы болургъа себеплик этерикди, дегенди ол.

Бу докладха къулакъ салып, Советни келечилери анда айтылгъанны дурус кёргендиле. Шёндюгю экономика болумда билим бериу, илму-излем, жамауат магъаналы эм башха жумушланы тамамларгъа ахча изленнгенин чертгендиле.

Алай бла жууукъ кезиуде Фонд эмда ол жыйгъан ахчаны жюрютюрюк компания да къураллыкъдыла.