Бёрю, метеке, сора дидинле

Бир жол бёрю агъачда келе болады да, аягъы бла метекени басады. Ол заманлада жаныуарла адамча сёлешип болгъандыла. Метеке ачыуланып:

- Не кюйсюз бёрюсе сен! Кесингден къарыусузланы малтап нек айланаса? Аллай бир неге махтанаса? Сюйсем сенден эсе терк чабарыкъма. Кел ёчешейик, сен да, сени нёгерлеринг да мени жеталлыкъ эселе,-дегенди.

- Сени уа къалай жеталмакъ, насыпсыз?-деп соргъанды бёрю,хыликкя этген халда.

- Ма алай.Тамбла кюн чыкъгъанлай, кесинг кибиклени да биргенге алып, ма былайгъа кел да, кёл жагъасына  къайсыбыз алгъа жетеригибизни кёрюрсе,-дегенди метеке.

- Ахшы, келирбиз,-деп, бёрю жолуна тебирегенди. Жыйырма атлам да этген болмаз эди, ол дидин уяны малтагъанды.

- Не кюйсюз бёрюсе сен, кесингден къарыусузланы нек малтайса? Биз,дидинле, гитчеле болгъанлыкъгъа, сенден къоркъмайбыз. Сюе эсенг, ёчешейик да,  биз сени да, нёгерлеринги да суугъа батдырырбыз.

- Быллай ууакъ-тюеклеми?-деп сорду бёрю, эринлерин чюерип.

- Ма биз. Тамбла кюн чыкъгъанлай, кесинг кибиклени да биргенге алып, былайгъа кел да, сизни кёлге батдырыр ючюн бизге алай кёп заман керек болмагъанын кёрюрсюз,-дегендиле дидинле.

- Ахшы, келирбиз,-деп, бёрю нёгерлерине билдирирге ашыгъады. Метеке уа дидинлеге:

- Шуёхларым, кесигизни дидин тукъумугъузгъа билдиригиз. Мени метекелерим да жыйыллыкъдыла. Кёл жагъаларында ёсген таланы бутакъларына бугъугъуз. Биз  бёрюлени къууалап келирбиз, сиз а къабып, ачытып, аланы суугъа секиртигиз.

- Сен айтханча этербиз,-дегендиле дидинле.

Алай бла дидинле, сёзлерине табылыргъа айтып, учуп кетгендиле. Метеке уа кёлге баргъан жолну узунуна хар беш атламдан бир метекени къойгъанды.

Экинчи эрттенликде, кюн чыкъгъанлай, бёрюле да, метеке да чабышыу башланырыкъ жерге табылгъандыла.

- Келдингми,метеке?-деп соргъандыла бёрюле.

- Келдим.Башлайыкъ,-дегенди метеке.

Бёрюле сюртюлюп кетедиле. Аяусуз чабып келе тургъанлай:

- Къайдаса, метеке?-деп соргъандыла бёрюле.

- Мындама,-дегенди, беш атламдан биринде тургъан метеке.

Бёрюле кёлню жагъасына тиллерин салындырып жетгенлей, дидинле, тал бутакъладан жыйын болуп, зызылдап чыгъадыла да, бёрюлени къабып, аман кюнлерин бередиле.

Насыпсыз бёрюле, къайры къачаргъа билмей, суугъа секиредиле. Дидинле уа башларында зызылдап уча, аланы башларын суудан чыгъарыргъа къоймайдыла. Амалсыздан бёрюле суудан бурунларын чыгъарып солургъа кюрешедиле. Дидинле уа бурунларындан къабып, ачытып, бёрюлени тунчукъма къоядыла.

Аны бла бёрюлени барысы да суугъа батадыла, метекеле бла дидинле, этген ишлерине ыразы бола, агъачха къайтхандыла, дейдиле.