«Кесинге гитче байрамчыкъла къурай билиу магъаналыды»

Бюгюнлюкде тиширыуларыбыз кеслерине аслам эс бёлгенлери, мени бек къууандырады. Юй жумушладан, ишден, сабийледен да бошап, башхалача, санларын, сыфатларын ариу, тап халгъа келтирирге заман тапханлары аперимликге тийишлиди. Салонла, ариулукъну араларын ачхан къызларыбыз а алагъа ол жаны бла себеплик этерге хазырдыла. Ма аллай араладан бирин Саракаланы Амина ачханлы иги кесек болады. Ол кеси да кёп сабийли анады: юч жаш ёсдюреди.

Аминаны «Санны коррекция арасына» жаш къызладан сора, абадан тиширыула да аслам жюрюйдюле. Мында алагъа артыкъ килограммладан тюрлю-тюрлю массажланы бла технологияланы хайырлана, къутулургъа болушадыла. Быллай Араны ачыу аны баш мураты эди. Ол анга, гитче атламла бла, бир ненча жыл келгенди. Энчи ыспас а ол анасына этеди.

- Мени анам башламчылыгъыма ийнанып, кёллендирип, не жаны бла да болушханды. Болмагъанча ыразыма, - деген сёзледен башлагъанды Амина ушагъыбызны. – Битеу бу иш неден башланнганды десенг а, кесим массажгъа баргъандан сора. Специалистни этгенин бек жаратхан эдим. Алай кесим андан да иги этерге боллугъуму ангылап, тынч-тынч юйренип, гитче салонда ишлеп башлайма. Адам а, кесинг билгенден, алай къуралыпды: гитче бла чекленип къалмай, айныргъа итине барады. Эрттеден а кесими энчи ишим, бизнесим болурун бек сюе эдим. Аны себепли Аллах бу жолгъа мени онг тапдырыргъа деп сюегенин ангылап, Ара ачаргъа таукел болама. Бюгюнлюкде мени къолумда 10 артыкъ адам ишлейди. Бара баргъан къадарда, кенгертирге дейме бизнесими.

- Юч сабий бла, юйюр да тутуп, иш юсюнде да таймай туруу, къыйын тюйюлмюдю?

- Адам заманын тап юлеше билсе, артыкъ къыйын болмайды. Сабийле бла аталары да болушады, анам да керек кезиуде табылады. Ала ангылайдыла мени ишим не бла байламлы болгъанын. Ол а бек магъаналыды.

- Сени оюмунга кёре, тиширыугъа бек магъаналы неди?

- Бек алгъа, ол кесин сюе билирге керекди. Алай болса, неда тынч къураллыкъды жашауунда. Юйдегиси, сабийлери, жууукълары да аны къол аязларында жюрютюрюкдюле. Психология даражада ол бек сезиледи. Аны себепли, багъалы тиширыула, кесигизни сюерге юйренигиз. Бюгюннгю жашауну излемлери эр кишиге, тиширыугъа да бирчадыла десем, ётюрюк болмаз. Аны айтханым, хар инсан да жаланда кесини кючюне, онгуна ийнаныргъа керекди. Тамблагъы кюн къалай къураллыгъын биреу да билмейди. Аны себепли, бизнесими мен кесим бардырама.

- Сизни Арагъа келген тиширыула бир къауум жорукъланы эсде тутаргъа керек болурла, мен ангылагъандан…

- Хау, сёзсюз. Этдирилген массажла эм дагъыда башха шёндюгюлю процедурала кёзге кёрюнюр ючюн, адам психология жаны бла хазыр болургъа керекди жангы сыфатха келирге. Аш-сууну юсюнден а айтхан да этмейме. Аны магъаналылыгъын хар бирибиз да толу ангылайбыз. Кесин белгиленнген мардадан чыкъмай тутуу баш жорукъладан бириди дерге боллукъма. Ансы бир ыйыкъдан кетген килограммланы бла сантиметрлени артха, жерлерине къайтарыу келишмейди аз да.

Ишимде мен инновациялы технологияланы бла аппаратланы хайырланама. Заман алгъа баргъаныча, ариулукъну индустриясы да ол халда жангыргъанлай турады.

- Сен кесинг къаллай процедураланы бегирек жаратаса? Мен билгенден, аланы курсла бла ётерге керекди.

- Хау, не тюрлю процедураны да курс бла ётедиле. Косметология процедурала массажны бир тюрлюсю бла бардырылса сан бек ариу болады. Ол себепден миостимуляция, парафанго, лазер шлифовка, бьютилазер эм дагъыда башхаладан сора тиширыуну териси сыйдам болады. Артыкъ килограммлары кетедиле. Сёз ючюн парафангодан сора 3 сантиметр кетеди. Дагъыда мен тиширыуланы бизге келмеген кезиулеринде юйде къаллай процедурала бардыра турса кереклисине юйретеме. Бюгюнлюкде тюкенледе багъа да болмагъан кёп затла сатыладыла. Аланы да бек тап хайырланыргъа болады.

- Бош заманынгы къалай ётдюрюрге сюесе?

- Ыйыкъгъа юч кере спорт залгъа жюрюйме, китап окъуйма. Окъургъа, жангы зат билирге бек сюеме. Андан сора да, табийгъатда солургъа неда республикадан тышына чыгъаргъа кюрешеме. Кесинге гитче байрамчыкъла къурай билирге керекди.