Мындан ары жоллары - мектепге

Сабий саддан мектепге  къууанчлы халда ашырыу   республикада болгъан битеу  садлада ахшы тёреге айланнганды. Аллай байрам бу кюнледе  Нальчикни  Дубки тийресиндеги  5-чи номерли   учреждениясында да болгъанды. Анга башчылыкъны  кёп жылланы ичинде  уллу сынауу болгъан, КъМР-ни  сыйлы  устазы  Лидия Азикова  этеди.  Ары ол кюн  дагъыда  тиширыуланы Нальчик шахар советини келечилери, аналары, ынналары, абадан къарындашлары, эгечлери да келген эдиле. Балачыкъла алагъа жырда, тепсеуде усталыкъларын кёргюзтюр ючюн, къолларындан келгенни аямай  кюрешгендиле.

- Биз ишибизде сабийлени искусствону сюерге , ариуну ангылай билирге юйретиуге уллу   магъана беребиз. Аланы культурагъа жууукълашдырыргъа кюрешебиз, адеп-къылыкъны да  унутмайбыз. Бизни саддан чыкъгъанла мектепде да айырмалыдыла, аны юсюнден устазла энчи белгилеп айтыучудула. Биз а  аллай шартла бла ёхтемленебиз. Ата-аналаны, ынналаны болушлукълары болмай ол жетишимге жеталмазлыгъыбызны да  билебиз, аны себепли алагъа жюрек ыразылыгъыбызны да билдиребиз,- дегенди Лидия Азикова.

Шахарда тиширыуланы советини таматасы Лидия Дигешева уа совет бардыргъан тюрлю-тюрлю ишлеге тири  къатышхан эмда «Интеллектуальный» конкурсда алчы жерлеге чыкъгъан жашчыкълагъа бла къызчыкълагъа дипломла, саугъала да бергенди. Лидия Азикова да, «Жюрегими сабийлеге береме» деген номинацияда хорлап, Дуния Артий комитетни саугъасына  эмда  алтын майдалына бу жол бла  экинчи  кере тийишли болгъанын да билдиргенди. Андан сора да быйылгъы жыл, белгилисича, устазны эмда юйретиучюню жылы болгъаны бла байламлы  Лидия Азиковагъа, дагъыда садда ишлеген башха  юйретиучюлеге, устазлагъа да  тиширыуланы совети  сыйлы грамотала, саугъала да бергенди.

Садда ишлегенлеге ыразылыкъларын анала да айтхандыла. Быйыл мындан элли беш сабий чыкъгъанды.

Холаланы Марзият.
Поделиться: