Энергетикле хунерликлерин кёргюзтгендиле

РусГидро компанияны бешинчи Спартакиадасыны «Къыбыла» къауумну айырыу кезиую кёп болмай Нальчикде ётгенди. Анга Къабарты-Малкъарда, Дагъыстанда, Къарачай-Черкесде, Шимал Осетияда бёлюмледе, Волжск, Къобан эмда Чиркей ГЭС-леде уруннганла къатышхандыла – битеу да 150 спортчу. Ала женгил атлетикада, кроссфитде, шахматлада, жюзюуде, стол теннисде эмда волейболда къарыуларын кёргюзтгендиле.

Быйылгъы эришиуледе женгил атлет энергетиклени эки къауумгъа бёлгендиле: 35 жыллары толмагъанлагъа эмда андан таматалагъа. Экинчилерини арасында, финанс-экономика бёлюмню алчы экономисти Аккуланы Татьяна чабышханланы ичинде биринчи жерни алгъанды. Былтыр да ол хорлагъан эди. Доммакъ майдалгъа уа Мухол ГЭС-ни келечиси Токълуланы Амина тийишли болгъанды.

Жыл санлары 35-ге жетмегенлени ичинде барындан да терк Шабатукланы Алим чапханды. Ол Огъары Малкъарда гитче ГЭС-ни гидроагрегатларына къараучу машинист болуп ишлейди.

3000 эм 2000 метрге чабышыуда тамата къауумда кюмюш майдалны финанс-экономика бёлюмню келечиси Марина Хужокова алгъанды. Къашхатау ГЭС-ни электромонтёру Къабардокъланы Ибрагим а доммакъ майдал бла саугъаланнганды. Аллай майдал дагъыда Ахкёбекланы Муратха берилгенди. Ол шахмат оюннга къатышхан эди. Жаш кеси да компанияны Къабарты-Малкъарда бёлюмюню оборудованиягъа эмда гидротехника мекямлагъа къарау службасыны башчысыды.

Бахсан ГЭС-лени къауумуну келечилери Будайланы Зульфия бла Бугов Азамат 50 метрге сюзюуде экинчи жерлени алгъандыла. Стол теннисде, тиширыуланы ичинде биринчи жерге инженер Эльмира Пшихачева чыкъгъанды, доммакъ майдалгъа уа слесарь Аслан Гедгафов тийишли болгъанды. Дагъыда кроссфит: анда Бахсан ГЭС-ни ишчиси Темирлан Азиков экинчи болгъанды.

Къауумланы арасында алтын майдал Къабарты-Малкъарда бёлюмге берилгенди, кюмюш Шимал Осетиягъа кетгенди, доммакъ бла уа Чиркей-ГЭС саугъаланнганды.

Хорлагъан къауум эмда биринчи жерлеге чыкъгъан спортчула «Къыбыла» бёлюмню атындан Спартакиаданы ахыргъы кезиуюне къатышырыкъдыла. Ол а Сочи шахарда ётерикди.