Кийимле тикген фабрика ишленирикди

Кёп болмай КъМР-ни Правительствосуну  Председатели Мусукланы Алийни башчылыгъы бла республикада  женгил промышленностьну айныутыу жаны бла кенгеш болгъанды. Аны чеклеринде   «Миртэкс» биригиуню келечилери   бла  кийим тикген фабрика ачарча онглагъа къаралгъанды.   Инвестицияла  проект КъМР-ни Башчысы  Казбек Коковну башламчылыгъы  бла бардырылады эм РФ-ни Промышленность эм сатыу-алыу министерствону жанындан да билеклик этиледи. 

Женгил промышленностьну айнытыу  Къабарты-Малкъаргъа болмагъанча къыйматлыды. Нек дегенде республикада бёлюм бла байламы  производство, технология, билим бериу мурдор эм  кадрла да бардыла. 

Бусагъатда иги къумачдан этилген затлагъа  сурам ёсгенлей барады. Ол санда къыралны заказын толтурурча,  аскерчилеге кийимле эм башха алыучулагъа да  танг кесек зат  тигерге  тюшеди.   

Продукция алыучулагъа  учуз багъасы бла келирча  амал да  этилликди.  «МИРтэкс» биригиу бюгюнлюкде окъуна республикагъа сырьёну  Ивановское  областьдан келтиреди.

Жангы фабрика Нальчикни промышленный районларындан биринде къураллыкъды. Мында бир жолгъа мингнге жууукъ адам урунурукъду эм жылгъа беш минг тонна хазыр продукция чыгъарыллыкъды. 

Республика кесини жанындан инвесторгъа не жаны бла да себеплик этерикди, ол санда  кадрла бла жалчытыргъа болушурукъду.  Бюгюнлюкде   фабриканы мурдорун  салыргъа жер юлюш берирча, инфраструктура бла жалчытырча онгла эм башха соруула  да  сюзюлгендиле.

Проектни багъасы  беш миллиард сомгъа жетеди. Ол   2025 жылдан кеч къалмай башланыргъа керекди.