Туризм жаны бла окъургъа сюйгенлеге

Бу бёлюмге специалистлени бизни къыралда кёп университетледе эмда орта билим берген учреждениялада юйретедиле. Тергеулеге кёре битеуда отуз чакълы программа барды. Сёз ючюн, ма быллайла: «Технология и организация туроператорских и турагентских услуг», «Менеджмент в туристской и гостиничной индустрии», «Рекреация и спортивно-оздоровительный туризм», «Событийная индустрия», «Предоставление экскурсионных услуг», «Индустрия питания», «Гостиничное дело» эм башхалары. Алагъа къайда юйренирге боллугъуну юсюнденди Объясняем.рф порталда басмаланнган материал.

Бакалавриатда окъуу тёрт жылны алады, специалитетде – беш, магистратурада уа – эки неда эки бла жарым. Школну тауусханланы вузлагъа ЕГЭ-ни эсеплерине кёре аладыла. Предметле: орус тил, тарых, обществознание неда тыш къыралланы тиллеринден бири (сайлаугъа кёре). Вузланы талайында колледжлери да бардыла, ала энчи (профессионал) билим бередиле.

Туризм жаны бла иги онглары болгъан шахарлада болгъан вузланы юсюнден да айтайыкъ.

Россейни туризм эмда сервис университети Москвада эм эрттегили вузладан бириди. Аны студентлерин кеслерине «Отель Ренессанс Москва», «Марриот Гранд Отель», «Рэдиссон Роял Отель Москва», «Мосгортур» дегенча аллай белгили компанияла да чакъырыучудула.

Анда бакалавриатда «Технология и организация услуг на предприятиях индустрии туризма», «Гостиничный бизнес» эм «Ресторанный бизнес» программала бардыла. Ахча тёлеп очный халда окъургъа сюйгенлеге бир жылны багъасы 85 минг сомду. Магистратураны уа – 119 минг сом. Анда «Государственное регулирование сферы туризма», «Экономика впечатлений в экскурсионной индустрии», «Инновационные технологии управления гостиничным бизнесом» программала бардыла.

Бу университетни колледжинде «Предоставление туроператорских и турагентских услуг», «Предоставление гостиничных услуг», «Предоставление услуг предприятия питания» бёлюмле ишлейдиле. Алада окъуу 109 минг сом турады.

Санкт-Петербургда «Туризм» усталыкъгъа СПбГУ-да юйретедиле. Алай анда жаланда бакалавриат барды. Аны багъасы – 208,7 минг сомду.

РАНХиГС-ни бу шахарда бёлюмюнде уа бакалавриат («Туризм» эмда «Гостиничное дело», 210 минг сом) эмда магистратура («Индустрия делового и событийного туризма», «Корпоративные стратегии гостиничного бизнеса», 120 минг сом) да бардыла, алай алада бюджет жер жокъду.

Санкт-Петербургну къырал экономика университетинде ала экилери да бардыла, алай багъала уа уллуракъдыла. Ахча тёлеп окъургъа сюйгенлеге бакалавриатда «Организация и управление в гостиничном и ресторанном бизнесе», «Организация и управление в индустрии туризма», «Управление и дизайн в индустрии событий» бёлюмледе окъуу 245,2 минг сом турлукъду. Магистратура да уа («Организация управления туристскими дестинациями» эм «Стратегическое управление предприятием индустрии гостеприимства») - 253,6 минг сом.

Бу шахарны туризм колледжинде официантха, барменнге, администраторгъа, сомельеге, метрдотельге да юйретедиле. Аш этиучюлени «Поварское и кондитерское дело» бёлюмде хазырлайдыла. Бир жыл окъуу 63,5-72 минг сом турады.

Казань шахарны федерал университетинде халкъла аралы туризм бёлюмде, къонакъ юйлени ишлерин бардырыргъа юйретедиле. Анда бюджет жерле да бардыла. Хакъ тёлеп окъургъа сюйгенлеге уа аны багъасы 142 минг сомду.

Физкультураны Приволжск къырал университетинде башха вузлада хазна болмаучу «Рекреация и спортивно-оздоровительный туризм» деген бёлюм барды. Аны тауусханланы стажировкагъа Кърымгъа, Сочиге да чакъырадыла. Окъуу 188 минг сом турады. Тогъузунчу классдан келгенлеге уа «Туризм и гостеприимство» программа ачхандыла. Аны багъасы 90 минг сомду.

Туризм неда рекреация жаны бла бай онглары болгъанла бу бёлюмлеге хазырлаугъа бютюнда уллу эс бурадыла. Тийишли вузла эмда билим бериу учреждениялада бёлюмле дагъыда Калининград областьда, Шимал Кавказда, Приморск крайда, Краснодарда, Сочиде эм кёп башха жерледе бардыла. ЕГЭ-ни иги бергенле бюджет жерлеге орналыргъа боллукъдула, башхалагъа уа хакъын тёлеп окъургъа онг бериледи.

Къабарты-Малкъар къырал университетде «Туризм» эмда «Гостиничное дело» факультетле бардыла. Экилеринде да бакалавриат эмда магистратура ишлейди. Алада бюджет жерлени саны 13-17 болады. Хакъын тёлеп окъуйма дегенлеге уа багъала (бир жылгъа) быллай бирдиле: бакалавриат – 101,5, магистратура – 108,6 мингишер сом.