Автомашина сатаргъа неда алыргъа сюйгенлеге женгил амал

Автомашинаны сатаргъа неда алыргъа сюе эсегиз, къагъытда келишимге къол салып айланмагъыз. Аны Госуслуги къырал порталда онлайн халда жарашдырыргъа боллукъду. Электрон келишимни кючю тюз къагъыт документдеча аллайды. Аны бла ГИБДД-да регистрацияны ётерге да жарайды. Бу амалны бир игиси, алыу-бериуге къатышханла бир-бирлери бла тюбешип айланмазгъа да боллукъдула.

Бу магъаналыды

•   Сатыучуну эмда алыучуну ол порталда шагъатлыкъны ётген регистрация жазыулары болургъа керекди;
•   Келишимни жаланда сатыучу жарашдырыргъа боллукъду;
•   Автомашина сатыучуну аты бла ГИБДД-да эсепде турургъа керекди.

Не зат изленирикди

• Эки инсанны да паспортлары;
• Автомашинаны регистрациясыны юсюнден свидетельство (СТС);
• Транспорт средствону паспорту неда аны электрон тюрлюсюнден информация;
• Келишим этерге сюйген эки инсанда да «Госключ» мобильный приложенияны болуру.

Келишим къалай этиледи

• Сатыучу, Госуслуги порталгъа кирип, келишимни толтурады;
• Ол алыучугъа жибериледи, бу адам а анга бир сутканы ичинде жууап къайтарады;
• Энтта да 24 сагъатны ичинде экилери да келишимге «Госключ» приложение бла къол саладыла;
• Экилерине да аны юсюнден билдириу келеди;
• Ала къол салгъанлары бла келишим кюч алады;
• Алыучу автомашинаны Госуслуги порталда эсепге салады. Тийишли заявление аллындан окъуна хазыр болады.

Бу да хайырлыды

Автомашина жюрютюучюлеге деп «Госуслуги Авто» мобильный приложение жарашдырылгъанды. Тазир салыннган эсе, ол аны юсюнден билдиреди, тёлерге да онг береди. Дагъыда электрон документлени кёргюзтеди, ДТП болса, европротоколну жарашдырыргъа болушады.