«Ишибизде эсли болургъа тийишлиди, ансыз адамлагъа чурумла чыгъарыргъа боллукъду»

Къырал эм муниципал жумушланы тамамлагъан арала (МФЦ) ишлеп башлагъанлы бир ненча жыл болады, ала адамла жумушларын бир жерде эм терк толтурурча этер мурат бла къуралгъандыла. Бизни республикада ала шахарлада бла элледе ачылгъандыла. Бюгюннгю ушакъ нёгерибиз Ахкёбекланы Марина Яникойну МФЦ-да ишлейди. 

- Марина, алгъа окъуучуларыбызны сени бла шагъырей этейик. Юйюрюнгю, къайда окъугъанынгы юсюнден айтсанг эди.

 - Мен Ахкёбекланы Жамалны бла Светлананы юйюрлеринде Чегемде туугъанма, эгечим Жамиля эм къарындашым Энвер бардыла. Чегемни мектебин бошагъанма, бийик усталыкъ билим а Къарачай-Черкесни къырал университетинде экономика жаны бла алгъанма. Андан сора Къабарты-Малкъар университетни юриспруденция факультетине киргенме, анда магистратураны тауусханма, уголовное право жаны бла юйреннгенме. Ишлеген а алгъа Яникойну администрациясында водоканалда бухгалтер болуп башлагъанма, андан сора бир жылны Росгвардияда уруннганма, анда да бухгалтер эдим.

 - МФЦ-гъа уа сора къалай келгенсе?

- Мени администрацияда таный эдиле, анда ишчи нёгерлерим бла артда да шуёхлукъ жюрютюп тургъанбыз, мында ишлерге ала чакъыргъандыла. Алгъа Чегем район МФЦ-да ишлеп тургъанма, бери уа мартда кёчгенме. Администрация бла бир мекямдабыз, коллективибизни, ишими да бек сюеме.

Мында  Яникойдан бла Каменкадан адамланы жумушларына къаралады, Шалушкадан келгенле да бардыла. Алай бир башха элледен, шахарладан, субъектледен да адамла бизде ишлерин тамамлаяллыкъдыла.

- Ишигизде къаллай борчла салынадыла?

- МФЦ-да тамамланылмагъан хазна бир жумуш да болмаз. Прописка, паспортла, жер байламлыкъла, пособияла тохташдырыу, справкала бериу, ол угъай, къырал жумушланы порталында эсепге салыу – ала ишибизни бир кесегидиле. Юлгюге, бюгюн манга МФЦ-да инсанны данныйлери бир организацияда да болмазча, аланы архивлеринде сакъланмазча заявление жазаргъа жарайды деп, тиширыу келгенди. Сорушдургъанымда, Чегемде бёлюмюбюзде, кертиси бла да, алай онг болгъанын билдиргендиле. Тиширыуну тилегин толтургъанма. Алгъаракълада пособияланы жангы тюрлюлери берилип башлагъандыла, аланы сурап бек кёп адам келгенди, болушханма. Тюрлю-тюрлю жангычылыкъланы ангылатырымы излегенле да бардыла, алагъа консультацияла береме. Алай бла кюнден-кюннге биз толтургъан жумушланы тизмеси кенгертиле барады.

 - Баям, быллай ишде жангыз бир тариххе окъуна ажашыргъа жарамайды, бек эсли болургъа керекди.

- Хау, иш тынч тюйюлдю, сен хар келген адамны аллында жууаплыса. Бир затны терс жазсанг, артда аны ишинде чырмаула чыгъарыкъдыла неда ол анга тийишли пособияланы алалмай къаллыкъды. Жангызда Росреестрге кюннге 20-гъа дери иш жиберебиз, ала бир терс зат тапсала окъуна, аланы артха къайтарлыкъдыла. Аналыкъ эм аталыкъ капиталланы хайырланыргъа болушама. Насыпха, алыкъа бир кере да жангылмагъанма. Былайда ишибиз бла байламлы структурала бла байламлыкъ жюрютгенибиз бек болушады, бир бирге сёлешгенлей, керек затны соргъанлай турабыз.

- Быллай жерде ишлеген адамны, башда сагъынылгъанындан сора да, къаллай шартлары болургъа керекди?

- Эсли. Айтханымча, гитче халатчыкъ, терс жазылгъан бир харф окъуна артда уллу чырмаугъа кёчерге боллукъду. Аны бла бирге уа терк да, санга келген инсанны сакълатып турургъа жарамайды. Законодательствода болгъан жангычылыкъланы билирге, бу жаны бла тирилик, законланы терк ангылай билиу да изленеди. МФЦ-ла адамлагъа тынчлыкъгъа, аланы структураланы араларында айландырыудан аяр ючюн къуралгъандыла да, ол борчну толтурургъа керекди. Сора, адамла бла ишлегенде тёзюмлю, намыслы болургъа тийишлиди.

Ушакъны Кульчаланы Зульфия бардыргъанды.
Поделиться: