Ахшылыкъ унутулмайды

Тырныауузда Элбрус районну ара больницасыны администрациясыны башламчылыгъы бла Россей Федерацияны Саулукъ сакълаууну отличниги, врач-хирург Гюлюйланы Магомедни жашы Сейпуллахха аны юйюню къабыргъасында эсгертме къанга салыннганды. Бу ишни район таматала да тийишли кёрюп, анга себеплик этгендиле, деп билдиреди штатда болмагъан корреспондентибиз Темуккуланы Асият.

Сейпуллах Магомедовични аты районда угъай, Россейде да белгили эди. Къыйын болумлагъа тюшген, жаралы болгъан кёп туристлени жанларын сакълагъанды ол. Гюлюй улу болушлукъ тапдыргъанланы араларында тыш къыраллыла да болгъандыла. Аны сабыр сёзюн, акъыллы къарамын, хар кимге да болушургъа итиннгенин киши унуталлыкъ тюйюлдю.

Аны эсгерирге районну бла шахарны башчылары, учрежденияланы таматалары, огъурлу врачны таныгъанла, анга хурмет этгенле, жууукълары эм къоншулары да келгендиле.

Ыразылыкъ сёзлери бла Элбрус районну администрациясыны таматасыны къуллугъун толтургъан  Сотталаны Къурман, Тырныаууз шахарны администрациясыны таматасы Чимайланы Тахир, районну ара больницасыны баш врачы Тилланы Хабибуллах, тукъумдан адамла да сёлешгендиле.

Сейпуллах Магомедович 1947 жылда сюргюнде туугъанды. Адамланы жашауларын къутхарыугъа къуллукъ этгени жаш тёлюге юлгю да, дерс да бола келгенди.  Ол район больницаны хирургия бёлюмюню таматасы болуп кёп жылланы ишлегенди. КъМР-ни  Саулукъ сакълау министерствосуну, Правительствосуну, Элбрус районну администрациясыны да махтау къагъытлары бла кёп кере саугъаланнганды. Ишчи нёгерлерини арасында намысы жюрюген, сёзюне тынгылата билген бийик профессионал болгъаныны юсюнден да аны биргесине ишлегенле ол кюн айтхандыла. Гюлле салып, баш ура, ыспас этгендиле. 

Аламат врач, хирург Гюлюйланы Сейпуллах дуниядан 2020 жылда кетгенди.