Июльда кючлерине кирген жангылыкъла

Энчи аскер операциягъа къатышханлагъа бла аланы сабийлерине билим бериу учреждениялагъа киргенде льготала, къыйын ауругъан сабийлеге дарманланы НДС-ден эркин этиу, бал тузу болгъан суусунлагъа акцизле. Июльда кючюне къаллай законла киргенлерини юсюнден бу къысха статьяда билдирирге сюебиз.

 Льготала

Энчи аскер операциягъа къатышханла эмда аланы сабийлери вузлагъа бюджет жерлеге  квотагъа кёре кирирге боллукъдула. Хакъ тёлеп окъугъанланы уа бюджет жерлеге кёчюрлюкдюле.

 Андан сора да, аскерчилени, операциягъа кеслерини ыразылыкълары бла къатышханланы сабийлери къырал сабий садлагъа, школлагъа, солуу лагерьлеге биринчилени санында алынырыкъдыла.   Аскер операцияда жан бергенлени сабийлери да хайырланаллыкъдыла бу эркинлик бла.

Аладан сора да, коронавирус жукъгъан ауруугъа  къажау багъыу бардыргъан кезиуде ауушхан медиклени сабийлери да саулукъ сакълау эм фармацевтика  программаланы толтургъан вузлагъа энчи квота бла кирирге боллукъдула. Алагъа экзаменле берирге керекмейди.

  Къыйын, аз тюбеген аурууладан къыйналгъан сабийлеге Россейде эсепде болмай, тыш къыралладан келтирилген дарманла НДС-ден эркин этилликдиле. Ала  «Круг добра» фонддан юлешиннгенде.  

 Налогла, акцизле

Налог тёлеучюле тийишли документлени жууаплы органлагъа «Госуслуги» порталны болушлугъу бла ашыраллыкъдыла. Алай этер ючюн ФНС-ге электрон амал бла билдириу жиберирге керекди.

Бал тузу болгъан суусун затла акциз товарланы тизмесине кийирилгендиле. Тёлеуню  ёлчеми бир литрге 7 сом боллукъду. Акцизле   суусун затда углеводла хар 100 миллиграммгъа 5 граммдан озгъан кезиуде алынырыкъдыла.  Сокла, морсла эм нектарла бал тузу болгъан суусунлагъа саналмайдыла. Бу закон халкъны саулугъун игилендирир, адамланы бал тузну азыракъ хайырланыргъа кёллендирир мурат бла жарашдырылгъанды.

 Пенсия, къырал себеплик

Инсан пенсия излеп келгенде неда къошакъ  тёлеулени алыргъа сюйгенде, къырал эм муниципал архивле битеу документлени Россейни Социал фондуну эсгертиулери бла берликдиле. Бу жумушла бирикдирилген къырал информация системаны юсю бла толтуруллукъдула.  Жангычылыкъла   пенсияны тохташдыргъан кезиуде битеу тийишли шартланы къысха заманны ичинде жыйышдырыргъа себеплик этерикдиле.

 Жашау журт-коммунал жумушла, сабий сад ючюн къоранчланы бир кесегин артха къайтарыу  дегенча регион себепликле бир низамгъа келтириледиле. Энди бу болушлукъну «Госуслуги» порталда алыргъа, ол къалай жарашдырылгъанын кёрюп турургъа боллукъду.

 Социал магъаналы жумушланы толтургъан коммерциялы болмагъан организациялагъа сайтларын къурауда неда аланы  къоркъуусузлукъларын жалчытыуда къырал болушлукъ берилликди.

Миллет доклад

Энди Правительство хар жыл да Къырал Думаны жыйылыуунда билим бериуде къырал  политиканы жашауда бардырыуну миллет докладын кёргюзтюрюкдю. Ол отчёт кезиуню ызындан келген жылны 15 майындан кеч къалмай хазырланыргъа тийишлиди.

Къырал Думаны башчысы Вячеслав Володин бу сферада парламент контрольну магъанасын белгилегенди.  «Правительствону доклады билим бериуде болгъан сорууланы сюзерге, чыгъарылгъан оноуланы игилендирирге онг берликди»,-дегенди ол.

Электрон амалла

Страхование келишимге къатышханла документле бла электрон амал бла алышыналлыкъдыла.  ОСАГО-ну юсюнден айтханда, страховой компаниягъа суратланы, видеону электрон амал бла ашырыргъа эркин этилгенди. Андан сора аварияны сылтауларыны юсюнден шартла  да автоматизацияланнган халда белгили этилликдиле.  

Россейде экстремист материалланы  энчи информация банкы ишлерикди. Аны къураугъа Юстиция министерство жууаплыды. Ол следствие органлагъа излеу-тинтиу жумушланы игилендирирге онг берликди.