Жангы регионланы къыралны жашаууна сингдируге – энчи эс

«Единая Россияны» халкъ программасыны «Жангы регионланы айнытыу» бёлюмюн жашауда бардырыуну мадарлары координация кенгешде сюзюлгендиле. Аны партияны генсоветини секретарыны орунбасары, жандауурлукъ жаны бла штабны башчысы  Анна Кузнецова бардыргъанды.

Ол партияны халкъ программасыны жангы бёлюмюн тамамлау жаны бла къауумла къуралгъанларын, алагъа жууаплы министерстволаны бла ведомстволаны келечилери киргенлерин билдиргенди. Баш магъана жангы регионлада инфраструктураны тапландырыугъа, жандауурлукъ болушлукъгъа бериледи.

Биринчилени санында   жашау журтланы, социал  эм коммунал объектлени  жангырытыргъа кереклисин белгилегенди Анна Кузнецова.  «2014 жылдан энчи аскер операция башланнгынчы дери кезиуде Донбассда Украинаны аскерлери школланы, сабий садланы, медицина учрежденияланы 20 процентин бузгъандыла. Быйылны аллындан бери уа Донбассда бла Таврияда  1,5  минг квадрат метр жашау журт жангыртылгъанды эм ишлетилгенди. Былтырны тарихлерин да къошсакъ, 800 социал магъаналы учреждение тапландырылгъанды, ол санда 400 школ бла сабий сад. Быйыл энтта 360 объект игилендирилликди. Бу жумушла федерал араны болушлугъу эмда регионланы кеслерини онглары хайырланып толтуруладыла»,-дегенди ол.

Аны бла бирге жангы регионланы къыралны праволу, маданият, социал жашаууна сингдириуге энчи эс бурулады. Ол мурат бла тийишли программала керек болгъанларын белгилегенди  докладчы. Ол санда медицина болушлукъ жаны бла да. Тамата тёлюню келечилерине стационар организациялада багъыу жумушланы хакъсыз къурауну юсюнден да айтханды ол. Сёз жангы регионлада  энергоресурслагъа льготаланы тохташдырыуну юсюнден да баргъанды.

Анна Кузнецова билдиргенича, жангы регионлада халкъ программаны жашауда бардырыу жаны бла кенгешле къураллыкъдыла. Алай бла уа кемчиликлени, жетишмеген затланы ачыкъларгъа энтта онг боллукъду.

 Партияны халкъ программасына 294 башламчылыкъ кийирилгенин айтырчады.   Аланы 2025 жылгъа дери тамамларгъа мурат барды. Документни къыралны халкъы къурагъанды, анга башламчылыкъланы онлайн халда берирге онг болгъанды.

Июньда уа программагъа 70 тюзетиу кийирилгенди. Ала бла бирге эки  жангы бёлюм къуралгъанды – «Жангы  регионланы айнытыу» эм «Туризмни айнытыу». Дагъыда билим бериу учрежденияланы тынгылы жангыртыу программа кенгертилгенди. Сабийле солугъан лагерьлени тынгылы жангыртыу жумушла да къошулгъандыла.