Билими, жетишимлери бла да – нёгерлерине юлгю

Спортда, окъууда да итиниулюклери, жетишимлери бла нёгерлерине юлгю болгъан сабийле халкъны тамблагъы кюнюдюле. Аллай умутландыргъан жаш адамларыбыздан бири Къалабекланы Фархатды.

Фархат Къалабекланы Алийни бла Зиттаны юйюрлеринде туугъанды, Звездный элни орта школуну жетинчи классында окъуйду, аны бла да чекленмей, билимин «Антарес» арада ёсдюреди, аланы экисинде да айырмалы белгиле алады. Олимпиадада къытып, сабийлени эм жаш тёлюню чыгъармачылыкъларыны «Солнечный шахар» академиясында эки ыйыкъны окъугъанды.

Спорт бла Фархат беш жылны кюрешеди. Боксда ол республикалы эм битеукъырал турнирлеге дайым къатышханлай турады, алада саугъа жерлеге да дайым чыгъады. Юлгюге, алгъаракълада ол Тырныауузда Россейни спортуну устасы Текуланы Маратны бла тренер Муаед Дышековну хурметлерине аталгъан турнирде, 40 килограммгъа дери ауурлукъда сермеше, доммакъ майдалны къытханды. Ызы бла Терекде битеукъырал эришиуде алтын майдалны алгъанды. Анда ол эки тюбешиу бардыргъанды, аланы экисинде да къаршчы спортладан кючлю болгъанды.

Аны тренер Тогъузаланы Ибрагим юйретеди, ол Фархатны низамлылыгъын, иш кёллюлюгюн, итиниулюгюн чертеди. «Нёгерлерини аллында да Фархатны намысы жюрюйдю, сора энди келген спортчулагъа да ол ариу халиси бла ахшы юлгю кёргюзтеди», - дейди.