Техника жангыртылады

Республиканы эл мюлкюнде уруннганла быйылны беш айында сатып алгъан жангы техниканы саны 74 жетгенди. КъМР-ни Эл мюлк министерствосунда айтханларына кёре, ол былтырдан асламды.

Битеу да 56 трактор, мирзеу оруучу юч комбайн, тюрлю-тюрлю машинала да алыннгандыла. Ала жангыртыла тургъанлары ючюн урлукъ себиу, сабанлагъа къарау, тирлик жыйыу ишле да тынгылы бардырыладыла.

Тахта кёгетледен бай тирлик

Быйыл ал тёрт айны эсеплерине кёре бизни республика эл мюлк продукция чыгъарыу жаны бла саулай СКФО-да биринчи жерге чыкъгъанды. Шимал-Кавказстат билдиргеннге кёре, ол кезиуде тогъуз миллиард сом багъасы продукция чыгъарылгъанды. Былтырны апрельге дери кёрюмдюсю бла тенглешдиргенде, ол 104,6 процент болгъанды.

Сугъарылгъан жерле кёбейгендиле

Быйыл Къабарты-Малкъарда 4,2 минг гектар сугъарылгъанды. Бу иш «АПК-ны продукциясыны экспорту» регион проектни эмда «Халкъла аралы кооперация бла экспорт» миллет проектни чеклеринде бардырылгъанды, деп билдиргендиле регионну Эл мюлк министерствосундан.

Сугъарыу бла кюрешгенлеге къыралдан 382,2 миллион сом багъасы болушлукъ этилгенди. Ол санда 378,4 миллиону федерал бюджетден берилгенди, къалгъан кесегин а республика къошханды.

Саулай айтханда, сагъынылгъан миллет проектни чеклеринде Къабарты-Малкъарда быйыл хайырланыугъа 6,5 минг гектар сугъарылгъан жер берилликди. Анга къырал 680 миллион сом къоратырыкъды. Эл мюлк министерствону битимчилик бёлюмюню башчысы Салим Хамжуев айтханнга кёре, аграрчыла сабанлагъа суу салыуну магъанасын бек иги ангылайдыла, тийишли оборудованияны орнатыугъа да эс бурадыла.