Сабийлеге тёлеуле берилликдиле

Къабарты-Малкъарда 337 юйюр 3 жыллары толмагъан сабийлеге аналыкъ капиталдан ай сайын тёлеуле аладыла.

Къыралны жанындан болушлукъну бу тюрлюсю файдалары адамгъа жашау этерге керекли ахчаны эм аз эки ёлчемине жетмеген юйюрлеге этиледи. Аны тохташдыргъанда, аланы ишлегенлерине бла къалгъанларына, мюлклерине къаралмайды. Быйылдан башлап анга тюрлениуле да кийирилгендиле. Алгъа жыллада ата-анала бу пособияны жангызда экинчи сабийге алыргъа эркин эдиле, бусагъатда ол биринчи балагъа да бериледи. Экинчи жангычылыкъ аны тёлеу кюню бла байламлыды – ол энди счётха хар айны бешинчи кюнюнде келеди. 

Тёлеуню алып башлар ючюн, юйюрге Социал фондну регионда бёлюмюне заявление жазаргъа керекди. Бу жумушну къырал жумушланы порталында энчи кабинетни юсю бла, фондну клиент службасына барып неда МФЦ-да толтурургъа боллукъду. Тёлеуню ёлчеми сабийге жашау этерге керекли ахчаны эм аз ёлчемине тенгди, бизни регионда ол 16 769 сомду. Тёлеу бир жылгъа тохташдырылады, ол болжал бошалгъандан сора, заявленияны жангыдан толтурургъа керек боллукъду.