Къагъанакъгъа тийишли къагъытла берилгендиле

Быйыл Россейни Социал фондуну республикада бёлюмю 3592 къагъанакъгъа проактив халда СНИЛС-лерин жарашдыргъанды, аны ючюн аланы ата-аналарына заявление бла клиент службагъа барыргъа керек болмагъанды.

2020 жылны июлюндан башлап сабийге лицевой счёт заявлениясыз ачылады. Ол жыл бу халда СНИЛС-ле 7955 балагъа жарашдырылгъандыла, 2021 жылда – 10 247, 2022 жылда – 10 298. Счётны юсюнден билдириу ананы къырал жумушланы порталында энчи кабинетине фондха тюз да ЗАСГ-ны реестринден сабий туугъаныны юсюнден информация келгенлей жибериледи.

Алай ананы порталда энчи кабинети жокъ эсе, фондну клиент службасына неда жууукъдагъы МФЦ-гъа паспорту эм сабий туугъаныны юсюнден шагъатлыкъ къагъыты бла барыргъа керекди. Страховой номерни ол кюн окъуна берликдиле.

Баланы лицевой счётуну номери аналыкъ капиталны, социал тёлеулени, борчлу халда медицина страхование этиу полисни алыр, поликлиникада эсепге турур, башха къырал жумушла бла хайырланыр ючюн керекди. Ол артда инсан ишге киргенде эм пенсиягъа чыкъгъанда да изленирикди.

Кульчаланы Зульфия.
Поделиться: