Ауузла, ауушла бла сейирлик жолоучулукъ

Бу кюнледе квадроциклледе эм внедорожникледе жолоучулукълагъа чыгъаргъа сюйгенлени «Квадроостров» клубларыны эм Орус география Обществону «Альтаир» жаш тёлю клубуну «Россейни хазнасы» проектни чегинде экспедициясы бошалгъанды.

Маршрутну краевед Орус география обществону келечиси Мокъаланы Тенгиз къурагъанды. Ала жолларын Архызда башлагъандыла, андан Къарачай-Черкесни ауушлары бла ёте, Къабарты-Малкъарда Бахсан плато бла Нарзанла таласына бла Жылы-суугъа жетгендиле, Минги тауда эм аны жанында ауузлада болгъандыла. Экспедициягъа къатышханла эки республиканы да ариу табийгъат жерлерин кёргендиле, жашагъан миллетлени турмушлары, ашханалары бла шагъырейленнгендиле.

«Россейни хазнасы» проектни жарашдырыргъа умут 2018 жылда, Москвадан къауум Баш Кавказ хребетни Къабарты-Малкъарда кесеги бла ётген кезиуде, этилгенди. Аны мураты внедорожникледе  бла квардроциклледе экспедицияланы къурауду, аланы чегинде уа жер-жерли табийгъатны, тарых-маданият хазнаны юсюнден билим жыйыуду. Быйыл энтта да аллай жети жолоучулукъ бардырыллыкъды, ала Къабарты-Малкъарны, Къарачай-Черкесни, Шимал Осетия-Аланияны, Ингушетияны, Чеченни бла Дагъыстанны жерлери бла ётерикдиле.