Искилтин болгъан къарылгъачла

Бир жол малла бла Сары  тала жайлыкъда эдик. Элден жыйырма къычырым чакълы кенгдебиз. Агъач, тау, ёзенле да бардыла. Кёп жылла мындан алда къая  ташладан ишленнген къошда  тёртеулен  болуп  турабыз. Къысыр малла да  бардыла,  асламы уа  сауулгъан ийнекледиле.

Эрттен бла эртте аланы сауабыз. Къуру къолгъа  ётдюребиз. Тёп-тёгереги бийик къаяла,  болгъан ариу, кенг ёзен. Минг тууар да сыйыныр алайда. Бирибиз алагъа къарайды,  къалгъанла бичен чалабыз.

Къош элден иги да да кенгде болгъаны ючюн, чыракъ алыкъа анда жокъду. Ингирде фатеген чыракъ  жандырабыз. Къошну къабыргъасыны узунлугъуна тапчан ишлеп, анда жатабыз. Журтну бир  терезеси, бир да эшиги барды. Терезе жерден бийигирекде орналыпды. Аны мюйюшюнде уа къарылгъачла уя ишлеп жашайдыла.

Бу къанатлы не заманда да адам жашагъан жерде салады уясын. Бала ёсдюрюп кетгенден сора да, экинчи жыл да ары къайтады. Сау къышны узакъ жерледе болуп, экинчи жыл дагъыда ары къайтханы сейирди.

Ма, быйыл да, биз къошда орналгъандан сора, къауум кюнден ала да жетдиле. Ариу жырчыкъларын чюйюлдей, тюрсюнлю бояула къоша кюннге. Эрттеден сакълап тургъан къаршыларыбызгъача къууандыкъ алагъа

Терезе башында эски уяларын тазалап, анда жашап тебиредиле. Жашладан бири терезени кёзлеринден бирин тешип, мияласын бир жанына  салды. Къанатлыла  алайтын учуп чыгъадыла,  къошха да алайтын киредиле. Айтханымча, къошубузда чырагъыбыз жокъ эди. Аны ючюн телевизорсуз, радиосуз кечинебиз, къарылгъачланы жырларына тынгылай.  Сейир затчыкъладыла къарылгъачла. Жокъду аладан кишиге да заран.

Бир кюн элден эки жаш келдиле. Бизден узакъ болмай бичен чаллыкъ эдиле. Къалгъан а бизни къошда этерикдиле. Жаш адамла болгъанлыкъгъа, ашаргъа, ичерге сюйгенле. Къауум аракъы шешаны ортагъа саладыла. Иги кечге дери тютюнню да букъулатып, шайтан сууларын да  ахырына дери тауусдула. Мен, арып келген,   ала тынчайгъынчы окъуна жукълагъан эдим.

Къарылгъачла уа, тыш адамланы  кёргенлеринде, уяны ичине кирдиле, бурунчукъларын азчыкъ тышына чыгъарып турдула. Эрттенликде уа уяннганымда, къанатлыланы жырларын  эшитмедим, кеслерин да кёрмедим, ингирде да жокъ эдиле ала.

Ол кюнден башлап  кёрюнмедиле. Жарсыдыкъ, алай не этериксе. Къанатлыны излепми табарыкъсы?

Андан сора да, дагъыда  юч жыл баргъан эдим малла бла ол къошха. Ол жаннет къанатлыланы бир да кёрмедим. Баям, тютюн, аракъы ийисден искилтин болуп кетдиле. Ала  юйде дауурну да кётюрмейдиле, дейдиле. Алай окъуна болур.