Мекямла тинтилгенлей турадыла

«Единая Россия» партияны халкъ программасыны чеклеринде ишленнген мекямланы болумлары тинтилгенлей турадыла.

РФ-ни Къырал Думасыны депутаты Виктория Родина бу жумушланы тамамлай, жарыкъландырыу эм илму министр Анзор Езаов бла Май эм Терк районлада билим бериу учрежденияланы къурулушларында болгъанды, деп билдиргендиле партияны КъМР-де регион бёлюмюню пресс-службасындан. 

- Жай айлада кёп жумушла толтурулгъанларын кёргенбиз. Школла кёз аллыбызда тюрленедиле. Жангыларында эмда программаны болушлугъу бла тынгылы жангыртылгъан мекямлада отоула жарыкъ, кенг болгъандыла, алада спорт бла кюреширча жерле, актовый залла къуралгъандыла. Бек магъаналысы уа энди сабийле бир сменнге окъурукъдула, - дегенди депутат.

Аны айтханына кёре, жангы окъуу жылда республиканы эллеринде бла шахарларында юч школ ачыллыкъды, алада 1785 окъуучугъа жер барды. Жылны ахырына дери уа энтта жети школ битдирилирге керекди. Алада 4539 окъуу жер къураллыкъды. Аладан сора да республикада тогъуз школ ишлетилликди. Шёндю хазырланыу жумушла толтуруладыла. Алада уа 5150 окъуучугъа билим алырча онгла боллукъдула.

Къурулушла дайым да тинтилгенлей турлукъларын белгилегенди Виктория Родина. Болжалла сакъланырларына бла тамамланнган жумушланы качествосуна энчи эс бурулады. Бир-бир мекямла битдирилгендиле, къурулуш компанияла кемчиликле болдурмагъандыла.

- Ишлерин билген, сынаулу адамладыла къурулушчуларыбыз, болсада битеу ишлени сюзгенлей турлукъбуз.  Школланы болумларын игилендириу  «Единая Россияны» халкъ программасыны магъаналы бёлюмюдю.  Бир гитче кемчилик окъуна сабийлени къоркъуусузлукъларын бузаргъа боллукъду, - деп къошханды парламентарий.

 Регионда ыйыкъны чеклеринде Виктория Родина Прохладный шахарда бла Прохладна районда билим бериу учрежденияланы болумлары бла шагъырейленирикди.