Безгек

Халкъла аралы байламлыкъла эм туризм кюч ала баргъанлары бла безгек да кенг жайылып башлагъанды. Бу жукъгъан аурууну Россейге  африкалыла, индусла, пакистанлыла, таджиклиле келтиредиле. Ал бир ненча жылны ичинде  безгек ауруу 97 къыралда бир бирге  кёчюп тургъанды. Ол кезиуде Россей Федерацияда аллай ауруу кёп жерледе эсепге алыннганды. Бизни республикада да аллай  саусузла болгъандыла.

Безгекни шартлары быладыла: адам алгъа  сууукъсурайды, къалтырайды, андан сора  эти отча къызады, тохтамай терлегенлей турады, башы ауруйду, къарыуу кетеди, эти саргъалады.

Ауруу тийгенлей, саусузгъа терк окъуна багъып башларгъа керекди, алай болмаса, ол ёлюрге  къоркъууду. Аны себепли тропикалы хауа болумлары болгъан къыраллагъа атланнган адам профилактика мадарла этиуге  уллу кёллю болургъа керек тюйюлдю. Жолоучулукъну къурагъан турист агентствола адамлагъа  ауруу жугъаргъа боллугъун ангылатыргъа борчлудула.

Тропикалы къыраллагъа - Африкагъа, Къыбыла-Кюнчыгъыш Азиягъа, Ара эм Къыбыла жанында Америкагъа атланнганлагъа борчлу халда химиопрофилактика мадарла этилирге керекдиле. Безгекден ауругъанлагъа къалай багъаргъа кереклисини юсюнден  консультацияны адамла жашагъан жерлеринде поликлиникалада инфекция аурууланы кабинетинде алыргъа боллукъдула.

Андан сора да, ургъуйла къапмазча мадарла этерге: гельле, аэрозольла, кремле хайырланыргъа керекди. Ала  адамны эти ачылгъан жерлеге жагъыладыла. Безгек ауруу къозгъагъан ургъуйла юйге кирмез ючюн, адамла терезелерине, эшиклерине марля жабыула неда сеткала тагъаргъа тийишлидиле.

Профилактика мадарла адамны жукъгъан аурууладан толу къоруулаялмагъанлары себепли тропикалы къыралладан къайтхан адамла  юч жылны ичинде температураларын кётюрген не тюрлю ауруу болса да,  врачха барып, саулукъларын тинтдирирге керекдиле. Паразитле адамны къанында кёп заманны ичинде жашап туруучудула. Аланы жаланда микроскоп бла тинтип ачыкъларгъа къолдан келликди.

Тропикалы безгек жукъгъан  адам профилактика мадарланы не къадар толу эм тынгылы этмесе, 48 сагъатны ичинде ёлюрге боллукъду. Аны себепли  бу затны юсюнде уллу кёллю болургъа жарамайды. Эсигизде болсун, жаланда сиз саулугъугъузну кесигиз сакълаяллыкъсыз, деп эсгертедиле бизге Роспотребнадзорну КъМР-де Управлениясыны эпидемиология надзор бёлюмюню  специалистлери.

Баллиланы Алима хазырлагъанды.
Поделиться: