"Тепсиге олтургъанлай"

Къоншу къыралланы биринде жашагъан таулу  киши, ата- бабаларыны журтларына биринчи кере келеди. Жууукъ жетген адамларын табады, ала да къонакъгъа тау адетдеча  жарыкъ тюбейдиле. Артха къайтханда уа, бизни жерлени, журтланы кёрмегенле жыйылып келип, хапар сорадыла.

-Нелери да ахшы, аламат, бек сыйлы кёрдюле,-дейди ол. -Бир аман затлары- тепсиге олтургъанлай Аллахха оноу этип тебирейдиле...

"Башха ишинг жокъмуду?"

Орта жыл санлы биреу,  эрттегили  тенглерине телефон бла сёлешип, тюберге излеп,  тап тюшгенин кёре, къайсы бла болса да  ушакъ этип тургъанды. Алай эте келип, къауум- къауум жыя да тюбегенди.

-Алан, бир-бирин жокълагъан, бир -бирин кёрюрге излеген игиди,- дейдиле алай бир жыйылгъан кезиулеринде. -Биз да угъай демейбиз анга. Алай а тюбешгенден сора да жумушла, къайгъыла кёпдюле.  Жунчутхан этесе. Башха ишинг жокъмуду?

-Сизге тансыкъ болуп этмейме алай, -деди мудахсынып.- Сизге тюбесем жашлыгъыма тюбегенча болама да, аны ючюн этеме...

"Тереннге кирме"

"Тийреледе кафеле, тюкенчикле, башха  затла ишлеп, сабийле ойнаучу жерлени да къолгъа жыйып барадыла" деп, гитчерек шахарны бирини жамауатындан  Нальчикге тарыгъыу къагъыт  келеди. Аллай ишлеге  жууаплыла талай адамдан комиссия къурап, анда болумгъа къараргъа, аны жазгъанла бла тюбеширге ашырдыла. Жамауатны келечилери,  быланы арагъа алып, болумну айтдыла, шахарны ичинде айландырып, жорукъсуз къалайда не ишлене тургъанын кёргюзтюп тебиредиле. Комиссияны къаууму чюйре ишлени кимле  этгенлерин, хар нени тюзетириклерин айтып бардыла. Бир жерде уа жорукъ артыкъда бузулгъанын чертдиле. Комиссиядан биреулен а  къызып къалды.

-Былай бир кел,- деди нёгери. Къолтугъундан кирип арлакъ элтди да:

-Бу участканы юсюнде алай тереннге кирме.

-Да кёресе да...

-Кёреме. Бу участка меникиди, ангыладынгмы...

 "Бюгюн кеталлыкъмысыз?"

Башха элден эрттенликде келген къонакъла, кюн ортадан озгъандан сора да кетер акъыллары болмагъанын къонакъбай артыкъ онгсунмады.

-Кюн жауаргъа ушайды, бюгюн кеталлыкъмысыз?- деп сорду аладан.

-Ант этип айтайым, сизге асыры тансыкъдан, бюгюн угъай да, тамбла, бирси кюн да хазна кетейик,-дедиле.

  "Бери къайт!"

 Жаз, Бахсан черек  къутуруп келген кюнледен биринде: "Бир къатын суугъа кетди!"- деп кимле эсе да хахай этдиле. Миллет Бахсан черек  таба къуюлду. Алларында ол къатынны эри чабып барады. Жагъагъа жетгенлей, ёрге айланды.

-Къайры бараса? Бери къайт! Тёбенде излерге керекди,-деп къычырдыла анга.

-Угъай,-деди башын  ары-бери булгъай. -Суу ёрге барады, деп туруучу эди. Къайда эсе да мындады...