Назмула, жырла да…

Озгъан шабат кюн Нальчикде Т.К.Мальбахов атлы  республикалы китапханада «Библиокече-2023» чеклеринде  прозаик, журналист, сценала жазгъан Игорь Терехов  эмда поэт, художник, макъамчы, архитектор, жырчы Сарбашланы Азнор бла чыгъармачы тюбешиу болгъанды.

Бу тюбешиуню  КъМР-де Асламлы  право информацияны арасыны башчысы, республикада украинлыланы маданият арасыны таматасы Светлана Харенко къурагъанды. Ол  келген къонакъланы  жигитлери бла  шагъырейлендиргенди, аланы жашау эмда чыгъармачылыкъ жолларыны юсюнден тынгылы хапар айтханды.

Ызы бла Игорь Терехов бла Сарбашланы Азнор  къонакъла бла кеслери тюзюнлей ушакъ этгендиле.

Терехов  аскерде къуллукъ этгенини юсюнден айтханды.

«Къайда болсанг, къайда айлансанг, къаллай болумда  да, ала бек къыйын эселе да, бек биринчи, адамлыкъ шартны тас этмезге керекди»,- деп чертгенди жазыучу сейирлик хапарын бошагъандан сора.

Сарбашланы Азнор а чыгъармачылыкъ ишде жолун къалай башлагъанын, анга кимле болушлукъ этгенлерини юсюнден айтханды.

«Заман ётгенден сора артха къарай, жашау къалай терк кетип баргъанын ангылайса. Къаллай динни тутханыгъызгъа, къаллай тилде селешгенигизге да къарамай, адам адамлай къалыргъа керекди. Не заманда да ол сыйлыды, багъалыды. Мени жашау жолумда кёп сейирлик, иги адамлагъа тюбегеним, насыбымды»,- деп бошагъанды хапарын Сарбаш улу.

А.Л.Ткаченко атлы суратлау искусстволаны музейини бёлюмюне таматалыкъ этген Нина Леонтьева,  адабиятны эки келечисин да бек уста таныйды. Ол чертгеннге кёре, Игорь Терехов жазыу иши бла  республикада бусагъатда атлары айтылгъан, белгили художниклени  асламлагъа туура этгенди.

«Сарбашланы Азнор бла уа биз эрттеден бери да уллу шуёхлабыз. Анга  музейни атындан сёлешип, бир жумуш айтсанг, олсагъат жетер. Мен аны бир заманда да угъай, деп эшитмегенме. Ол алай айта да биле болмаз, деригим келеди бир-бирледе»,-деп чертгенди Леонтьева.

Залда олтургъанладан бир тиширыу а Азнорну назмуларындан бирин кёлден айтханды.

Филология илмуланы доктору, КъМР-де  илмуну сыйлы къуллукъчусу, илму-излем институтда  къабарты адабиятны илму секторуну таматасы Светлана Алхасова уа Игорь Тереховдан  назмуларын окъурун тилегенди.

 Андан сора Азнор да,  гитарасын къолуна алып, кесини бир ненча жырын  айтханды.

Ол кюн алайда дагъыда Сарбашланы Азнорну бла Игорь Тереховну китапларындан  «Туугъан жериме фахмум эмда илхамланыуум» деген ат бла китап кёрмюч да къуралгъан эди.

«Игорь Николаевич  эмда Азнор Азретович – аламат хапарчыла эмда ушакъ нёгерледиле, ма аны себепли  тюбешиу да сейирлик болгъанды. Озгъан жылда кесини жюзжыллыкъ юбилейин белгилеген бу китапхананы залында  олтургъанла ол аламат, фахмулу   адамла бла  тюбешиуню иги кесекге дери эсден кетермезликлерине бир тюрлю ишегибиз жокъду»,-деп белгилегендиле китапханада иги кесек жылны ишлегенле да.

Къонакъгъа келгенле уа «Библиокече» жылгъа бир кере угъай, айгъа бир кере бардырыла турурун сюйгенлерин билдиргендиле.

Адабиятны сюйгенлени соруулары да кёп эдиле, алай аланы барындан да бег а литераторла  ёсюп келген жаш тёлю бла  къаллай бир тюбешиуле къурагъанларыны юсюнден эдиле.

Аламат ингир   Фатима Ногмованы тилеги бла къумукълу  автор Нигматулла Далгатовну назмусун малкъар тилге Азнор кёчюрген «Унутма мени» деген жыр  бла бошалгъанды.