Огъурлу ветеранны энчи алгъышлагъандыла

Кёп болмай Чегем муниципал районну администрациясыны башчысы Юра Борсов, районну  прокурору Созайланы Тахир, ич ишлени бёлюмюню таматасы   Мурат Хажнагоев, билим бериу управленияны таматасы Арипшева Жанна эм башхала   Уллу Ата журт урушну ветераны Хочуланы Магометни Хорламны 78-жыллыгъы бла алгъышлагъандыла.

 Хочуланы Бекмырзаны жашы Магомет 1923 жылны 15 июлюнда Чегем районну Думала элинде туугъанды. 1942 жылны 5 июнунда Къызыл Аскерге хауа-десант аскерледе къуллукъ этерге чакъырылгъанды. 1942 жылны сентябринден 1943 жылны майына дери Ленинградны тийресинде Шимал-Кюнбатыш фронтда 15-чи гвардиялы  хауа-десант дивизияны  къауумунда ПТР-ни наводчиги болгъанды. Андан сора Ара фронтха тюшгенди, Орлов-Курск дугада  ПТР-ни бёлюмюню командирине салыннганды. 1943 жылны ноябринде Карель  фронтха мараучуланы  ротасыны  сапёрланы бёлюмюне жиберилгенди. Урушну ахырында Магомет Норвегияда Киркенес шахарда болгъанды, Хорламгъа Москвада тюбегенди.

 Урушда, урунууда да болдургъан жетишимлери ючюн Хочу улу  кёп саугъала бла белгиленнгенди: Махтаулукъну ючюнчю даражалы, Ата журт урушну экинчи даражалы орденлери,  «Германияда хорлам ючюн»  «Бет жарыкълы уруннганы ючюн»,  «Заполярьяны къоруулау ючюн»  майдалла  эм башхала.

 - Уллу Ата журт уруш  бизни халкъа уллу къыйынлыкъ келтиргенди. Къызыл аскерчилени жигитликлерини,  жанларын-къанларын аямай къазауат этгенлерини хайырындан Уллу Хорлам  келтирилгенди.  Сёзсюз,  Магомет Бекмурзаевич  барыбызда ёхтемленнген жерлешибизден бириди. Жигитлерибизни эсде тутаргъа, сый берирге тийишлибиз,- деп чертгенди Юра Борсов.