Алты жюзден аслам адам къутхарыу операциягъа къатышханды

Адамланы эм жерлени къыйын болумланы хатасындан къоруулаугъа, бийик таулада ачыгъанланы къутхарыугъа салгъан къыйынлары, кёп жылланы бет жарыкълы ишлегени ючюн республиканы Башчысыны оноуу бла МЧС-ни Элбрус бийик тау излеу-къутхарыу отрядыны таматасы Мишаланы Ахмадиягъа «Къабарты-Малкъарны сыйлы къутхарыучусу» деген ат берилгенди.

Мишаланы Ахмадия Къыйын болумла жаны бла министерствода ишлегенли 30 жыл болуп келеди, битеулю урунуу стажы уа 44 жылды. Талай заманны ол слесарь-наладчик, ташчы, формовшик болуп тургъанды, бийик усталыкъ билим а Краснодарны къырал университетинде «Физкультураны преподаватели» деген  жаны бла алгъанды. Алгъа турист комплексде ишлегенди, ызы бла уа, къутхарыу жаны бла. 2016 жылдан бери Элбрус бийик тау излеу-къутхарыу отрядха таматалыкъ этеди, халкъла аралы класслы къутхарыучуду, «Жанларына къоркъуу болгъанланы къутхаргъаны ючюн» майдал бла саугъаланнганды.

Отрядда Ахмадияны бийик усталыкъны къутхарыучуланы хазырлаугъа этген къошумчулугъун, къыйын болумлагъа чыгъыуда хазырлылыкъны тутууда сакълыгъын белгилейдиле. Ол кеси да излеу-къутхарыу ишлеге тири къатышады, ала уа бийик таулада кюнню халына къарамай, отряд жууаплы жерледе, андан тышында да бардырыладыла. Кеси заманында ол Чеченде къуллукъ этгенди, Аргунда, Буйнакскда, Владикавказда, Знаменскийде, Моздокда бла Нальчикде террор актладан, жер тепгенден, ырхыла келгенден эм курт юзюлгенден сора къыйын болумланы хаталарын кетериуге къыйын салгъанды. 2000 жылны жайында Тырныауузда ырхыла келгенде нёгерлери бла адамланы къоркъуусуз жерлеге элтгенди. Андан сора бир кесек замандан Шимал Осетия-Аланияны Кармадон ауузунда Колка чыран эрип ырхыла келгенден сора ачыгъанланы излерге, Ставрополь крайда сакъ жауунладан сора жер-жерлени суу басханда адамлагъа болушургъа баргъанды. Кесибизни республикада Куба-Таба, Куркужин, Карагач эм Кичибалыкъ элледе суу басханда къоркъуулу жерледен адамланы чыгъаргъанды, къыйын болум салгъан заранны кетериу ишлеге къатышханды.

Алай Ахмадияны ишини баш борчу таулада ажашхан неда къыйын болумлагъа тюшгенлеге болушууду. Чегетде къар юзюлгенде курт тюбюнде къалгъан тау лыжачыланы бла сноубордчуланы эм къыйын болумлада кёп сагъатланы излегенлери эсиндеди, ол кезиуде ала саулай жангызда бир инсанны тапхандыла, къалгъанлары ёлген эдиле. 2021 жылны июнунда Чегем ауузунда таудан ташла агъызылгъанларыны юсюнден билдириу келген эди, анга уа сегиз адамдан къуралгъан турист къауум тюшгенди. Аладан ючюсю жаралы болгъандыла, Мишаланы Ахмадияны башчылыгъында къутхарыучула ачыгъанлагъа олсагъатлай атланнгандыла. Альпинистле жангызда экинчи кюн тау этегинде табылгъан эдиле.  Къутхарыучула аланы жел къаты уруп, ташла тюшюп, булутла да энишгеде болуп – аллай болумлада излегендиле. Аланы усталыкъларыны хайырындан туристлени къоркъуулу жерден вертолёт бла чыгъаргъандыла.

МЧС-де ишлей Ахмадия 600-ден аслам къутхарыу операцияда болгъанды.

Кульчаланы Зульфия хазырлагъанды.
Поделиться: