Каспий чабакъчыкъла - череклерибизде

РусГидро компанияны адамлары бизни республикада череклеге 300 мингден артыкъ каспий  чабакъчыкъ жибергендиле алгъаракъда. Аны бла гидроэнергетикле суулада чабакъланы санын кёбейтиу программаларыны энтта да бир кесегин тындыргъандыла.

Кёп болмай а - быйыл жаз башында окъуна, аладан череклеге 600 минги жиберилген эди. Жылны ахырына дери этиллик ишлени да къошуп тергегенде, быллай чабакъчыкъланы саны бир миллион чакълы боллукъду. Ал жыллада уа РусГидро Росрыболовствону Шимал Кавказда бёлюмю бла бирге череклеге бла кёллеге тёрт миллион чабакъчыкъ жиберген эдиле. Бу жол да энергетикле ол ведомствону специалистлери бла оноулашып алай мадар этгендиле.

Чабакъчыкъланы энчи заводда бир жылны ёсдюредиле. Ауурлукълары 13-20 граммгъа жетгенлей, суугъа жибередиле. Жерине уа энчи транспортда ташыйдыла. Кеслерин да сууукълукъну, башха излемлени сакълап алай. Ала тунчугъуп къалмазча, орунлада хауа да тийишлисича жетерге керекди.

Черекледе биоресурсланы сакълауда, алагъа жаланда чабакъчыкъла жибериу бла чекленип къалмайдыла. Компанияда айтханларына кёре, Тёбен Черек ГЭС-лени къауумуна кирген станцияланы хар бирини да жанында энчи жолчукъла бардыла. Тёбен жанындан сюзюп келген чабакъла сууну огъары жанына ма ала бла чыгъадыла.

Быллай ишни компания бёлюмлери орналгъан башха регионлада да бардырады. Аны кезиуюнде череклеге чабакъланы къадар тюрлюлерин жибередиле. Ол санда эм багъалыла, Къызыл китапха тюшгенле да бардыла.