Судьяланы тюз оноулары – адамланы тынчлыкълы жашауларыны мурдору

Къабарты-Малкъарны Жамауат палатасыны Жамауат къоркъуусузлукъ, законлукъну сакълау эм ОНК бла байламлыкъла жюрютюу жаны бла комиссиясыны жыйылыуунда мировой судьяланы ишлери сюзюлгенди. Жыйылыугъа республикада мировой судьяланы ишлерин жалчытыу жаны бла службаны, Верховный сюдню, Сюд приставланы службаларыны регионда управлениясыны келечилери къатышхандыла.   

Бюгюнлюкде республикада 50 мировой судья ишлейдиле, сюд участкала административ аралада 13 мекямда орналадыла. Аланы барасыны да Интернетге чыгъарча, «КонсультантПлюс» право система бла хайырланырча амаллары, компьютерлери эм башха керекли техникалары барды. Сюдле ётдюрюлген 13 залда видео эм аудио протоколланы бардырырча системала орнатылыпдыла. Мировой судьяланы аппаратларыны штатына 150 адам киреди, аладан 50-си судьяланы болушлукъчуларыдыла, 50-си – секретарладыла, къалгъанлары уа сюд участкаланы специалистлеридиле. 

 Къабарты-Малкъарны 2019 жылны 30 декабринде чыгъарылгъан 45-чи номерли законуна тийишлиликде Мировой судьяланы ишлерин жалчытыу служба республиканы бюджетини мировой судьяла салгъан административ тазирледен жыйылгъан файдасыны баш администраторуду. Былтыр ол 86,7 миллион сом болгъанды. «Къырал эм муниципал службаланы кереклерине товарланы алыуну контракт системасыны юсюнден» 44-чю федерал законнга тийишлиликде служба озгъан жылны 12 айында 99,3 миллион сомгъа 109 къырал келишим тауусханды. Битеу сюд участкала картриджле, офис къагъыт, связь, почта-марка продукция бла чурумсуз жалчытылыннгандыла.

 РФ-ни «Правосудие» кырал автомат системасында КъМР-ни мировой судьяларыны 50 сайты ишлейди. Судьяланы эм Сюд приставланы федерал службаларыны араларында документле электрон халда бир бирлерине жибериледиле, гражданладан келген электрон тарыгъыула «Правосудие» портал бла келип тургъандыла. Къыралны субъектлери барысы да тестлени ётгенлеринден сора регионну битеу сюд участкалары «Электрон правосудие» сервисге къошуллукъдула, аны бла уа гражданла бла организацияла иск заявленияланы «Правосудие» портал бла онлайн халда бераллыкъдыла.

 Службаны башчысыны орунбасары Чеченланы Лариса билдиргеннге кёре, ала 2022 жылгъа салыннган борчланы барысын да тамамлагъандыла. Быйыл да ала сюд участкалагъа ишлерин тыйгъычсыз бардырырча керекле бла жалчытырыкъдыла, андан сора да Урван, Май эм Терк районлада участкалагъа мекямла излеу бла кюреширикдиле, Прохладна бла Чегемде участкалагъа мебель аллыкъдыла, Нальчикдегилени мекямларына ремонт этерикдиле.

 Мировой судьяланы ишлерини юсюнден айтханда, жылдан-жылгъа аланы ишлери кёбейе баргъанын белгилерге тийишлиди: былтыр ала бир айгъа 480 ишге къарагъан эселе, 2021 жылда – 425-не, ол а 13 процентге азыракъды. 2022 жылда мировой судьялагъа битеу да 253 443 заявление келгенди. Анга шагъатлыкъны Нальчикни мировой судьясы Роберт Журтов да этгенди. Ол чертгенича, быллай болумлада кандидатланы ишлерине багъа бичиуню, кадрланы сайлауну магъанасы бютюн ёседи.

Сюд приставланы федерал службаларыны КъМР-де управлениясыны бёлюмюню башчысы юстицияны экинчи класслы советниги Къазийланы Марина билдиргеннге кёре, алагъа келген оноуланы асламысын мировой судьяла чыгъаргъандыла. Анга кёре управление 202 974 толтуруучу производство ачханды. Документлени сюзюуню болжалын къысхартыр ючюн аланы электрон халгъа кёчюрюу барады, бу амал дагъыда материалагъа къарауда халатла жибериуден сакълайды, ишни ачыкъ толтурургъа себеплик этеди.