Аты урунууну сыйлы китабына жазылыпды

Боллуланы Османны жашы Жабырайыл белгили къурулушчуду. Нальчикде кёп къатлы юйлени асламында барды аны къыйыны. Ол 1937 жылда Тёбен Чегемде туугъанды. Сюргюнде Къазахстанда акъылбалыкъ болгъанды. Джамбул тийресинде Ровное элде жетижыллыкъ школну бошап, Жабрайыл колхозда ишлеп башлагъанды.

1958 жылда уа Джамбулда эл мюлк училищени механизация бёлюмюн бошагъанды. Ата журтха къайтхандан арысында Барамтада жашагъанды. Келе-келгенлей окъуна анда Ленин атлы колхозда ишлеп башлагъанлай, аскерге чакъырылып, андан 1962 жылда къайтханды эм 6-чы къурулуш управлениягъа къалаучу болуп баргъанды. Дагъыда «Рембытстройда», 4-чю къурулуш управленияда, Юйле ишлеген комбинатда ишлей, штукатур, бетонщик, мастер да болгъанды. КъМКъУ-да къурулуш инженерге окъугъанды. Ол жыллада марксизм-ленинизмни университетин да бошагъанды.

Бийик билим алгъандан сора Жабрайыл Юйле ишлеген комбинатда  инженер  баш инженер, прораб болуп да ишлегенди. 

Нальчик шахарда кёп юйлени къурулушуна къатышханды: Дубкиде Къартла тургъан юй, Электровакуум заводну мекямы, «Искож» комбинат, «Телемеханика»  «Химзавод», «Полупроводникле», Туберкулёздан ауругъанлагъа диспансер, Станокла ишлеген завод, Урванда школ...

Жашау юйлени айтханда уа, ала Тарчоков, Неделин, Гагарин, Калмыков, Мусов, Калинин, Тельман атлы, Къурулушчу, Къабарты орамлада, Терек шахарда да сюеледиле. 

Кеси эсгергеннге кёре, Искожда военкоматха бетлешип сюелген тогъуз къатлы юйню башын жапхандан сора, ол жер  тепсе, оюлмай къаллыкъмыды деп сынаргъа Москвадан лаборатория комиссия келген эди. Юйню башына вертолёт бла быллай сынауда хайырланыучу машинаны орнатханларында, ол бир ненча такъыйкъаны ичинде юч минг кере тёгерек айланнганды ол юй башда. Юй, ары-бери ауаракъ болса да, къаты сюелгенди.

Ол затха тюбюнден СССР-ни къурулуш министри, Социалист Урунууну Жигити Николай Голдин, Къабарты-Малкъар обкомну биринчи секретары Тимбора Мальбахов, комиссияны башха членлери да къарап тургъандыла. Ол сынаудан сора, келгенле къурулушчуланы ишлерине бийик багъа бергендиле. Жабрайылни уа къырал белгилеген мардалагъа сакъ болгъаны ючюн энчи махтагъандыла. Фатарланы иелерине ачхычланы алгъыш бла Боллу улу кеси тутдургъанды. 

1988 жылда 7 декабрьде сагъат онбир бола, Арменияда жер тебип, Ленинакан бла Спитак шахарланы жер бла тенг этгенде, сау къыралдан, бизни республикадан да ары болушлукъгъа ол кюн окъуна кёпле атланнгандыла. Жабрайыл да ала бла болгъанды. 

Бизни къурулуш-монтаж поездибиз жюз адам болуп, кранладан башлап, керек техниканы да алып, Ленинаканнга баргъанды. Белгиленнген жерде оюлгъан юйледен къалгъан сыныкъланы кетергендиле, хар бирине ючжюз сабий жюрюрча, юч мекям ишлегендиле. Алада Жабрайылни къыйыны уллуду. Техника жетмегенде, «Каббалкпромстрой»  трест Липецк шахардан сатып алып, он тонна кётюрген кран бла жалчытханды аланы. Алай бла, Къабарты-Малкъардан баргъан жашла, юзмезден, ташдан башлап, кеслерини къурулуш материалларын да келтирип, алай болушхандыла къыйынлыкъгъа тюшгенлеге. Ала анда дагъыда 900 квадрат метр болгъан ангарла ишлегендиле, бетондан суткагъа 300 кубну  жарашдыргъан жер да къурагъандыла. 

Бу ишлени тапдыргъан къурулушчу къауумгъа Боллуланы Жабрайыл да  баш инженерча къатышханды.  

1990 жылда къырал саясат тюрленип, кёп уллу биригиуле чачылгъанда, Жабрайыл жангы къуралгъан «Леопард» къурулуш компаниягъа баш инженер болуп киргенди. Ызы бла, солуугъа кетгинчи, «Мермерде» ишлегенди. 

Урунууда этген жетишимлери ючюн Боллуланы Османны жашы Жабрайыл  «Урунууну ветераны» деген сыйлы атха,   ВЛКСМ-ни АК-сыны майдалларына, «Армян ССР-де Ленинакан шахарны жангыртханы ючюн», «ХI бешжыллыкъны ударниги», «Коммунист урунууну ударниги» белгилеге эм иги кесек сыйлы грамотагъа тийишли болгъанды. 

Аны аты Нальчикни «Бек иги пропагандист» деген  эмда «Каббалкпромстрой» трестни сыйлы китапларына жазылыпды.