Коммунальшиклени борчлары кёпдю

Бюгюнлю Къабарты-Малкъарда  «Россети Северный Кавказ»  компаниягъа  ток ючюн кёп заманны тёлемей тургъанланы  бирлерине  суу  эм жылыу бла жалчытхан организацияла саналадыла. Саулай алып айтханда, алагъа  электрокюч борчну 94 проценти жетеди,- деп билдириледи энергокюч бла жалчытхан биригиуню пресс-службасындан.

Эсге сала айтсакъ, быйыл биринчи апрельге  чыгъарылгъан эсеплеге кёре,   республиканы жашау журт – коммунал мюлк предприятиялары «Россети Северный Кавказ» компаниягъа 1,3 милилард сом берликлери барды. Аны асламысы буруннгу жыл августдан бери  ойнагъанды.  Жыл башланнганлы коммунальшикле  тёлеулерин 24 процентге жетдиралгъандыла. Алай бла  сагъынылгъан борчларына дагъыда   238 миллион сом къошулгъанды.  

Арт заманда  ток ючюн эм уллу борчлары болгъан организациягъа "Водоканал" эм  «Нальчикские тепловые сети" биригиуле саналадыла. Бюгюнлюкде аланы 515 эм 154 миллион сом берликлери барды.

 Энергетикле тёлемей уллу кёллюлюк этгенлеге   дайым борчларыны бир кесегин окъуна  жабаргъа кереклисин билдиргенлей турадыла.  Болсада «коммунальщиклени» кёбюсю аны къулакъгъа да алмайдыла.  Аланы ток ыздан кесерге жарамагъаны  ючюн а тёлеуле этилирча ишлерин сюдге берирге тюшеди.  

Андан сора да, быйыл  энергетикле организацияланы таматаларын субсидиялы жууаплылыкъгъа тартырча амалны тири хайырланырыкъдыла. Аны бла бирге регионну толтуруучу власть органлары бла да къысха  байламлыкъ жюрютюллюкдю.  

Магометланы Сулейман.
Поделиться: