Ырысхыгъызнъа сакъ болугъуз

 РФ-ни законларына тийишлиликде, биреуню алдап, неда ышандырып, аны  ырысхысын урлагъан   РФ-ни УК-сыны 159-чу статьясына кёре  уголовный жууапха тартылады. Болсада ахыр кезиуде хыйлачыла шёндюгю технологияланы хайырланадыла ахча къоллу болур ючюн. Аланы энчиликлерин бизге КъМР-ни прокуратурасыны федерал законланы тамамлаугъа надзор жаны бла бёлюмюню тамата прокурору Ирина Маденова ангылатады.

 - Инсанларыбызны асламында дистанциялы халда алдайдыла аманлыкъчыла. Сиз танымагъан биреулен телефонугъузгъа сёлешип, банкны келечиси болгъанын айтады эмда   счётугъуз жабылгъан этеди,  ахчаны башха жерге кёчюрюрге керекди дейди.   Анга сизни картагъызны тарихлери  белгили болсала, хыйлачыла ахчагъызны бир тюрлю чырмаусуз урларыкъдыла. Аны себепли  картаны тарихлерин, CVV2 кодну  бир адамгъа да айтмагъыз. Ишекли болгъан эсегиз а, банкны бёлюмюне сёлешип, ишни болумун сурагъыз,-деп юйретеди бизни ушакъ нёгерибиз.

Аны айтханына кёре, хыйлачыла интернетни онглары бла да кенг хайырланадыла. Сёзге, товарны учуз багъасы бла сатханларыны юслеринден билдириулени басмалап. Анга алданып, адамла ахчаларын ашырыргъа боллукъдула. Хыйлачы уа  ол жетгенлей билдириуню басмадан кетерип, телефонну ёчюлтюп, тас болуп къалады.

- Быллай алдаудан сакъланыр ючюн сатыучу бла ахчаны   товар жетгенден сора тёлеуню юсюнден келишим этерге керекди. Багъасын толусунлай алгъадан тёлеп къоймагъыз, ахчасыз, товарсыз  да къалыргъа боллукъсуз,-деп эсгертеди прокурор.

Жууукъ адамыгъыз хатагъа тюшгенди, аны къутхарыр ючюн ахча керекди. Быллай билдириулени алмагъан адам хазна къалгъан болмаз. Болсада танымагъан инсанны  сёзлерине ийнанып, жууукъларына болушур ючюн ахчаны тёлеп къойгъанла аз тюйюлдюле. Болсада, Ирина Маденова айтханыча, быллай кезиуледе бек алгъа жууугъугъузгъа, неда аны танышларына сёлеширге, аны болумун сураргъа керекди.

 - Дистанциялы халда этилген аманлыкъланы тинтген къыйынды. Инсан хыйлачы бла бетден-бетге тюбемейди, аны ючюн а  бузукъчуну тохташдырыргъа онг болмай къалады. Аны бла байламлы республиканы инсанларын сакъ болургъа, кесигизни мюлкюгюз ючюн жууаплы болургъа чакъырыргъа сюеме,-дейди ол.