Транспорт эм жол мюлк

Элбрус районда муниципалитетле аралы маршрутла бла адамланы жюрютюуге «Эльбрус Авто» общество жууаплыды. Аны ючюн 49 машина хайырланылады, аланы барысында да ГЛОНАСС системала бардыла. Районну ичинде маршрут сетьни игилендирирча ачыкъ конкурсла къуралгъандыла, бу жаны бла иш мындан арысында да бардырыллыкъды.

«Къабарты-Малкъарда транспорт системаны айнытыу» къырал программаны чегинде Тырныауузда Отаров эм Гызыев орамлагъа толу ремонт этилгенди, Элбрус элде участка больницагъа элтген жол тапландырылгъанды. Дагъыда «Прохладный-Баксан-Эльбрус» А-158 автожол, «Кёнделен-Западный Кинжал - ул. Больничная - к амбулатории» жол жангыртылгъандыла.

Адамла жаяу жюрюген жерлеге да къаралгъанды, аланы  билим бериу учрежденияланы къатларында кесеклери жангы излемлеге келиширча этилгендиле. Ишле 1-чи номерли лицейни, Элбрус регион колледжни эм Кёнделенде 1-чи номерли мектепни экинчи корпусуну къатында жаяу жолчукълада толтурулгъандыла.

Билим бериу

Районну билим бериу учрежденияларында окъугъанланы саны 2021-2022 окъуу жылда 3678 болгъанды. Сабий садлагъа уа 1498 бала жюрюгендиле. Школланы барысыны да Интернетде официал сайтлары барды. Алай бла ата-анала, жамауат да битеу керекли информацияны кёраладыла. Былтыр «Билим бериуню школ системаларын айнытыу» федерал проектге кёре Кёнделенни 1-чи номерли мектебини бир кесегинде бла 1-чи номерли лицейни эки блогунда толу ремонт этилгенди.

«Цифра билим бериу среда» проектни хайыры бла Кёнделенни 1-чи мектебине бла Быллымны школуна, 5-чи номерли гимназиягъа шёндюгюлю компьютерле алыннгандыла.  Лашкутада бла Огъары Бахсанда «Точка роста» арала ачылгъандыла. «Хар сабийни да жетишими» проектге кёре уа 6-чы мектепде бла 5-чи гимназияда спорт залла жангыртылгъандыла.

Саулукъ сакълау системаны игилендирирча – аслам жангы оборудование

КъМР-ни Саулукъ сакълау министерствосуну «Саулукъ сакълау къырал бюджет учрежденияны жангыртыуну юсюнден» буйругъун толтурууну чегинде Элбрус элни участка больницасы Ара район больницагъа къошулгъанды. Районда саулукъ сакълау системада 68 врач-специалист, 196 орта медицина персонал, 39 да санитар ишлейдиле. Тюрлю-тюрлю профильли докторла изленедиле, штат 80,4 процентге толупду.

Мекямларына толу ремонт этилирча программагъа тырныауузну поликлиникасы бла Кёнделенни амбулаториясы киргендиле. Республикалы министерствону резерв фондундан «Лада Гранта» автомобильни, эндоскопну, видеогастроскопну, видеоколоноскопну, видеобронхоскопну, электрохирургия эм ультразвук  хирургия аппаратла, тележка, трансдьюсер,  инсуффлятор, ёпкелени солутхан эм наркоз этиу аппаратла, башха медицина оборудование алыннгандыла. «КСИ-Озон» общество спонсор халда «Лада Веста» автомобильни саугъалагъанды. Озгъан жылны ахырында дагъыда терк медицина болушлукъ этген машина да алыннганды.

Маданият

Былтыр Россейде Маданият хазнаны жылы эди, бизде уа анга республиканы 100-жыллыгъын белгилеу да къошулгъанды. Алагъа жораланып, районну культура учрежденияларында халкъ чыгъармачылыкъны айнытырча, маданият тёрелени, тарых эм культура эсгертмелени, республиканы миллетлерини энчиликлерин сакъларча мероприятияла къуралгъандыла. Аланы ётдюрюуде энчи магъана ёсе келген тёлюлени Ата журтха сюймекликде юйретиуге, аланы эстетика, граждан-право, тин-ниет жаны бла айныуларына берилгенди. Культура учрежденияланы барысында да художестволу кружокла хакъсыз ишлейдиле, жаш тёлю биригиуле, абадан адамлагъа бла чекленнген онглары болгъан сабийлеге сейилерине кёре клубла бардыла.

Культура фонд да жангыртылады, Быллымны Маданият юйюню мблк-техника хазнасы игилендирилгенди. «Культура» миллет проектни хайырындан районну краеведение музейи федерал эм республикалы субсидияланы алгъанды. Ол ахчагъа экспонатланы кёрмючлеге салырча оборудование, аланы бузулмай сакъларча керекле алыннгандыла. Арт кезиуде учреждение 105 экспонатха да байыкъланнганды. Сора, «Культура» миллет проектге кёре Тырынауузну Ара китапханасы модель библиотекагъа тюрлендирилгенди.

2023 жылгъа борчла

«Тынчлыкълы шахар болумну къурау» федерал проектге кёре Тырынауузда «Солнышко» солуу эм культура пракны айбатландырыргъа, Быллымда Тебердиев атлы орамда бла Кёнделенде Ленин атлы орамда скверлени, Элбрус элде арбаз тийредлени тапландырыргъа белгиленеди. «Къабарты-Малкъарда билим бериуню айныту» къырал программаны чегинде Быллымда, Элбрусда, Нейтринода мектеплеге, Тырныауузну 3-чю номерли школуна толу ремонт этилликди.

«Эл жерлени шёндюгюлю кёрюмдюлери»  федерал проектге кёре Элбрусда 300 жери бла Культура юй, спорт комплекси ишленирикдиле, Тырныауузда Къулийланы Къайсынны атын жюрютген Культура мекям толусунлай жангыртыллыкъды, Тегенеклиде суу быргъылагъа къаралырыкъды.

Кульчаланы Зульфия хазырлагъанды.
Поделиться: