Шарт борчла салыннгандыла, магъаналы буйрукъла берилгендиле

Тюнене КъМР-ни Башчысы Казбек Коков Парламентге Посланиясы бла сёлешгенди.    

КъМР-ни Парламентини кезиуден алгъа  бардырылгъан жыйылыуу Правительствону юйюнде бардырылгъанды. Анга РФ-ни Федерация Советинде республиканы келечилери, Къырал Думаны депутатлары, Къабарты-Малкъарны законла чыгъарыучу, толтуруучу, жер-жерли власть органларыны къуллукъчулары, федерал органланы КъМР-де бёлюмлерини таматалары,    жамауат эм дин организацияланы, политика партияланы келечилери эм башхала къатышхандыла. 

Сёзюню аллында республиканы оноучусу, РФ-ни Президенти Владимир Путин Федерал Жыйылыугъа этген Посланиясында къыралыбызны айнытыуда шарт борчла салгъанын белгилеп, республиканы власть органлары да аланы ишлеринде башчылыкъгъа аллыкъларын чертгенди.

Казбек Валерьевич, залда энчи аскер операциягъа къатышханла бла аланы жууукълары болгъанларын белгилеп, алагъа эмда аланы бетлеринде кеслерини борчларын толтургъан батыр жашларыбызгъа ырызылыгъын айтханды. Ол аскерчиле  Ата журтубузну къорукъуусузлугъун, жалынчакъсызлыгъын къоруулагъанларын, кишиликни юлгюсюн кёргюзтгенлерин чертгенди.   «Жарсыугъа, аладан  бир къаууму аны ючюн жанларын бергендиле. Биз батыр жашларыбызны жигитликлерин  эсибизде  сакъларыкъбыз»,-деп, республиканы оноучусу ёлгенлени бир минут шумсуз туруп эсгерирге чакъыргъанды.  Аланы  юйюрлерине къырал себеплик мындан ары да этиллигин, аланы жууукъларын къайгъырыулукъну сезерча мадарла толтуруллукъларын чертгенди.

Ол билдиргенича, СВО башланнган кезиуден бери республикалы бюджетинден бу жумушлагъа 400 миллион сом къоратылгъанды. Жууукъ кезиуде уа КъМР-де Ата журтубузну къоруулаучуларыны къырал фондуну бёлюмю ачыллыкъды.  Андан сора да, «Жигитлени сабийлери» регион проект жашауда  тамамланыллыкъды. Ала энчи аскер операциягъа къатышханлагъа, аланы  сабийлерине не жаны бла да болушлукъ этер мурат бла къураладыла. 

Андан сора Россейни жангы регионларыны тёрт районуна шеф болушлукъ этеди. Къазауат башланнган кезиуден бери   атышыуладан Къабарты-Малкъаргъа къачып келгенле бардыла,   аланы битеу излемлерин тамамланадыла.

Запад къыралла Россейге къажау санкцияла кийирип, аны экономикасын бузаргъа умут этгенлерин да белгилегенди.  «Алай къыралны экономикасы айныуну кёргюзтгенди, ол санда Къабарты-Малкъарда да иги жанына тюрлениуле бардыла»,-дегенди   эмда сёзлерине шагъатха   тарихлени белгили этгенди.

Республиканы кесинде чыгъарылгъан продуктну ёлчеми  242  миллиард сом болгъанды (былтырны 103,3 проценти).  Промышленностьда  тарихле  102,1 процентге, эл мюлкде 110 процентге жетгендиле. Инвестицияла 4,5 процентге кёбейтилип, 57,8 миллиард сом багъасы жумушла толтурулгъандыла. Ёсюу къурулушда да барды – 6 процентге. Тамамланнган ишлени багъасы 35,6 миллиард сомгъа жетгенди.

- Адамланы къолайлыкълары аланы сатыу-алыу онгларына кёре тергеледи. Алай бла былтыр бу тарихле 13,8 процентге ёсгендиле. Ол а къыралда иги кёрюмледен бириди,-деп къошханды ол.

Андан  ары Казбек Коков хар сферада да толтурургъа белгиленнген жумушланы юслеринден айтханды, Правительствогъа буйрукъла бергенди. Энчи ол миллет проектлени заманында эм тынгылы толтурургъа кереклисине эс бургъанды. 

Айлыкъны юсюнден айта,   жылны аллындан бери хакъны 8,4 процентге кёбейтирге къолдан келгенин белгилегенди. Алай бла бюгюнлюкле орталыкъ айлыкъ 35799 сомгъа жетеди, алай аны энтта ёсдюрюрге муратла бардыла.

Посланияда социал тёлеулени юлешиуню, инвестиция проектлени, газ бла жалчытыуну, гитче эм орталыкъ бизнесге къырал себепликни, туризмни  айнытыуну, жолланы тапландырыуну юслеринден да баргъанды сёз. Былтыр 180 километр жолла тап халгъа келтирилгендиле, 70 километрде чыракъла орнатылгъандыла. Быйыл да бу жумушланы андан ары бардырыргъа белгиленеди, ол санда 120 километр  жолла тийишли халгъа келтирилликдиле. Жол мюлкге 4,5 миллиард сом берилликди. Туризмни юсюнден айта, 2025 жылгъа дери КъМР-ге келген къонакъланы санын 2 миллионнга дери жетдирирге битеу онглары болгъанын чертгенди.

Посланияны ахырында Казбек Валерьевич салыннган борчла толтуруллукъларын шарт айтханды. «Бек магъаналысы уа къысха заманны ичинде Хорлам  тохташып, жашларыбыз юйлериге къайтырларыды»,-дегенди.

Тикаланы Фатима.
Поделиться: