Кючню бирикдириу – хатадан сакълар

Росгвардияны Къабарты-Малкъарда ведомстводан тышында охрана управлениясыны къуллукъчулары регионда МЧС-ни Баш управлениясы бла бирге энчи составы бла жалгъан от тюшгенде къутхарыу операцияны бардыргъандыла.

Болумгъа кёре, от Нальчикде ведомствону тышында охрана управлениясыны мекямыны экинчи къатысына тюшгенди. Аны эслегенлей, анда болгъанланы мычымай къоркъуусуз жерге элтгендиле.

От ёчюлтюу – къутхарыу бёлюмню дежурный къарауулу, белгиленнген жерге келгенлей, от къалайгъа тюшгенин тинтгенди. МЧС-ни келечилери, солуу органланы къоруулагъан амалланы хайырлана, кислород масканы да алып, ачыгъанны жана тургъан мекямдан тышына чыгъаргъандыла. Юйрениулени кезиуюнде Росгвардия бла МЧС-ни дежурный бёлюмлери бир бирлери бла байламлыкъда ишлеуде сынамларын ёсдюргендиле.

- Росгвардияны КъМР-де ведомстводан тышында охранасы къыйын болумла чыкъгъанда къутхарыучула бла бирге ишлеп кёргенди. Ала бийик усталыкъларын, байламлыкъда борчларын толтура билгенлерин да кёргюзтгендиле, - дегенди Росгвардияны республикада управлениясыны от тюшюуге къоркъуусузлукъну жалчытыу жаны бла инспекциясыны башчысы майор Улбашланы Расул.

Холамханланы Алима.
Поделиться: