Полициядан билдириуле

Казнагъа сууукъ къан жетдиргенди

Экономикада аманлыкълагъа къажау оператив-излеу жумушланы чеклеринде, ФСБ-ны КъМР-де Управлениясыны къуллукъчулары, ич ишле органланы келечилери бла бирге коммерциялы организацияны башчысы У.Мирзоевни бузукъчу ишин тохтатхандыла. Ол «Къоркъуусуз эм качестволу жолла» миллет проектни тамамлагъан кезиуде кёп санда бюджет ахчаны урлаугъа къатышханы  ючюн терсленеди.

Тохташдырылгъаныча, предприниматель Элбрус районда жолну тапландыргъаныны юсюнден жалгъан документлени хазырлагъанды.

Нальчикни шахар сюдю У.Мирзоев РФ-ни УК-сыны 159-чу статьясыны 4-чю кесегине бузукълукъ этгенин тохташдыргъанды эмда аны эркинлигин 3 жылгъа бла 6 айгъа сыйырыргъа деген оноуну чыгъаргъанды. Ол терсленнгенини тутмакъда тутмай  толтурлукъду.

Саугъамыды, улутхамыды?

Коррупциягъа къажау жумушланы тамамлагъанда,  ФСБ-ны КъМР-де Управлениясыны къуллукъчулары, Сюд приставланы федерал службасыны республикада бёлюмюню келечилери бла бирге хыйлачылыкъ этгенине эм улутха алгъанына ишеклини бузукъчу ишин тохтатхандыла.

Белгили болгъан шартлагъа кёре, УФССП-ны келечиси, сюдню оноуун толтурмай, законлагъа бузукълукъла этип, толтуруу бегимлени жапханды. Аны ючюн а ахча саугъа алгъанды.

РФ-ни СК-сыны КъМР-де следствие управлениясыны къуллукъчулары Россейни УК-сыны 159-чу статьясыны 3-чю кесегине эмда 290-чы статьясыны 3-чю кесегине бузукълукъла этилгенлери бла байламлы уголовный ишни ачхандыла. Законлагъа тийишлиликде, быллай аманлыкъ этгенни эркинлиги 8 жылгъа дери сыйырылыргъа боллукъду.