Сабан ишлени кезиулеринде бардырыргъа себеплик этеди

Озгъан жылда Къабарты-Малкъарны эл мюлкде уруннганлары сабан ишлени бардырыргъа, тирликни жыяргъа, техникаларына запас кереклени мажарыргъа эм отлукъ-жау материалланы алыргъа иги кесек ёнкюч ахчаланы къоратхандыла. «Албир» деген эл мюлк производстволу кооперативни таматасы Алакаланы Иналны айтханына кёре, сагъынылгъан жумушланы тамамлагъанда жыл сайын фермерлеге Россельхозбанкны Къабарты-Малкъар Республикада бёлюмю иги кесек болушлукъ этеди.

«Бизни битеу муратларыбызны эм уллу проектлени тамамларгъа ырысхы жаны бла башда айтылгъан финанс учреждение дайым онг тапдырады. Мен башчылыкъ этген эл мюлк биригиу банкны регион бёлюмю бла 2005 жылдан бери ишлейди, андан бери 50 кере ёнкюч ахчаланы алгъанбыз. Банк бла байламлыкъ жюрютгенли бери бир кере да бизни тилегибизни толтурмай къоймагъандыла, биз да бир заманда да тёлеулени кезиуюнде  ётдюрмей къалмагъанбыз», - дейди Алака улу.

 Белгилерчады, «Албир» эл мюлк биригиу республикада биринчи болуп «Россельхозбанкдан» жылгъа беш проценти болгъан кредитни алгъанын.

«Россельхозбанкны» финанс жаны бла эллилеге болушлукъ этгени республикада сабан ишлени кезиулеринде бардырыргъа себеплик этеди, ол  амал аш-азыкъ бла къоркъуусузлукъну жалчытыргъа онг береди. Андан сора да, финанс учреждение къыралны жанындан берилген болушлукъну эл мюлкде уруннганлагъа жетдирирге танг себеплик этеди», - дегенди Россельхозбанкны Къабарты-Малкъар Республикада бёлюмюню таматасы Алим Сокуров.

 Былтыр финанс учрежденияны республикада бёлюмю орта эм гитче бизнес бла кюрешгенлеге битеу да 391 миллион сом ёнкюч ахчла бергенди, аладан 205 миллионну эл мюлк предприятияла, фермер мюлкле эм энчи предпринимательле алгъандыла.

Бизни корр.