Китапла да окъуй, кинолагъа да къарай

Арт кезиуде къыралыбызны шахарларында, эллеринде библиотекалагъа уллу эс бурула тебирегенди. Мекямларына ремонт этедиле, жангы оборудование орнатадыла. Адамла китапха эс бурурча тюрлю-тюрлю амалла къурайдыла.

Бу кюнледе Тырныауузда аллай библиотекаладан биринде болгъанма. Аны таматасы Малкъондуланы Лежинкады. Андан сора да, мында Хочуланы Фатимат  бла Тохаланы Светлана ишлейдиле. Ары келгенлеге ала бет жарыкълы тюбейдиле. Излеген китапларын къолларына бередиле. 

Мында жыйырма сегиз мингнге жууукъ китап барды. Ала хар бири да магъаналарына кёре тапкалада ариу тап жыйылыпдыла. Аланы араларында Россейни, тыш къыралланы, республиканы жазыучуларыны чыгъармаларын кёребиз. Асламысы жангыладыла. 

Лежинка Солтановна айтханнга кёре, жылны ичинде бери жыйырма мингден артыкъ адам келеди. Аланы араларында школчула, абаданла, ол тийреледе орналгъан Росгвардияны келечилери да бардыла.

– Китапладан сора да, интернетге къошулгъан компьютерле да бардыла. Андан сора кинотеатрыбыз да.   Келгенле аланы да хайырланадыла. Бирле интернетде кеслерине керек затланы излейдиле. Бир-бирле уа киногъа къараргъа сюедиле, – дейди библиотеканы таматасы бизни бла ушагъында.

Кертиси бла да, биз ары баргъан кюн къауум школчу компьютерле алларына олтуруп, дерслерин эте тура эдиле. Къауум адам киногъа къарай. Ангыламагъан жерлери болса, Светлана Антоновнагъа бла Фатимат Мухтаровнагъа сора эдиле. 

Республиканы тийресинде  тюрлю-тюрлю даражалада адабият эришиуле бардырыладыла. Алагъа къошулургъа сюйгенле да бери келип хазырланнганларын белгилерге излейме. Ма аллай онгла бардыла Тырныауузну сагъынылгъан библиотекасында. Сёзсюз, мында ётдюрюлген заман зырафына кетерик тюйюлдю.
Бирде уа окъуучула устазлары бла да келедиле бери. Бу кюнледе да  Тырныауузну 5-чи номерли  прогимназиясыны орус тилден бла литературадан устазы Жаппуланы Аминат  онунчу классны окъуучулары бла келип, жазыучу, журналист Османланы Хыйса бла тюбешгендиле.

Алагъа Элбрус элни библиотекасыны таматасы  Сарбашланы Светлана да къошулгъанды. Тюбешиуде сёз Хыйсаны жашау жолуну эм китапларыны юслеринден баргъанды. «Манга китап жазаргъа, тилибизни да иги билирге себеплик этген «Заман» газетибизди  эм анда ишлегенледиле», – деп башлагъанды сёзюн  автор. «Ёз тилибизде чыкъгъан жангыз газетибизни, башха чыгъармаланы ала, окъуй туругъуз», – деп да къошханды ол. Андан сора хар китабыны, аланы къалай хазырлагъанын да билдиргенди. Окъуучуланы сорууларына да жууаплагъанды. Сарбашланы Света уа Хыйсаны «Тансыкълыкъ» деген назмусун кёлден айтханды. Жыйылыуну ахырында Элбрус район библиотека системасыны таматасы Тебердиланы Лейла сёлешгенди.