Усталыгъы чыгъармачылыкъгъа ушайды

Къашхатауда ёсген жаш Нёгерланы Алим сейир усталыкъны – косметологну жолун сайлагъанды. Ол бюгюнлюкде Москвада ишлейди. Косметолог болгъанындан сора да, дерматовенерологду, «Эксперт» деген илму-саулукъландырыучу араны кенгешчисиди. Инъекцияланы эмда аппаратланы хайырланнган  амалла  жаны бла шагъатлыкъ къагъыты  болгъан устады.

Таулу жашны къыралыбызны ара шахарында кёпле таныйдыла. Аны билимине, окъуулулугъуна ышанып, оюмуна тынгыларгъа, кёз къарамын эшитирге, неда болушлукъ излеп да келедиле.

Алим гитчелигинден да врач болургъа сюйгенди. Асламысында шприцле, системала бла ойнай, кесини жумушакъ илляуларына кёп кере «уколла» да этгенди. Ол мураты бла элде школну айырмалы тауусхандан сора Саратовдагъы Василий Разумовский атлы къырал медицина университетге окъургъа киргенди.

Эм алгъа нейрохирург болургъа излегенди. Аны себепли биринчи курсдан сора нейрохирургияда хирурглагъа ассистентлик да этгенди. Алай эсе да, бир-бир врачланы саусузлагъа, жарсыугъа, асыры жандауурлу болмагъанларын эслей, медицинаны бу ызына сюймеклиги къалай эсе да суууп къалгъанын да жашырмайды.

Артда реаниматолог-анестезиолог неда сабий хирург болургъа да сагъыш этеди, нек дегенде сайлар онг бар эди. Косметологиягъа уа бешинчи курсда келгенди. Кесин кечиндирир ючюн, иш излеп, эм алгъа Саратовда, ызы бла Москвада ол жаны бла курсланы бошагъан эди. «Кертиди, алыкъа студент адамлагъа бу жумуш бла кюреширге тийишли да тюйюл эди. Алай эсе да, ботокс бла шприцни къолумда биринчи кере бешинчи курсда болгъанымда тутханма», - дейди ол кеси уа ушагъыбызны кезиуюнде.

Андан болушлукъ излеп келип, артда уа кеслерини сыфатларына ыразы болгъан адамланы кёзлеринде къууанч сезимни эслегенинде уа, бу сайлауу аны алдамазлыгъын да ангылагъанды. Аланы жашауларыны качествосу игиленир ючюн ишлей, ыспасха тийишли бола, ыразылыкъ сёзле да эшитеди. Усталыгъын андан ары ёсдюре, Саратовда университетни бошап, ызы бла Москвада РУДН-ни дермато-венерология эмда косметология ызында билим алгъанды.

Ариулукъну юсюнден сагъышлары, ангылаулары да докторну, аны аллына келген адамны да бирча болургъа, бетни эстетикасын да бир кибик кёрюрге тийишлиди деп чертедиле устала. Кертиди, адам кесине врачны сайларгъа эркинди. Биринчи жерде уа, айхайда, докторну билимлигиди, окъуулулугъуду, адамла бла ариу сёлеше билиуюдю.

Бюгюнлюкде косметология бла врачла-дерматовенерологла, пластика ызда ишлеген хирургла эркиндиле кюреширге. Ала бу жаны бла биринчи специализациягъа тёрт-беш айны ичинде тюшюнедиле. Белгилисича, доктор тохтаусуз кесини усталыгъын ёсдюргенлей турургъа борчлуду. Ол неда бу препаратны хайырланыргъа, аны бла ишлерге жаланда башха-башха сертификатлагъа тийишли болгъанлагъа, башхача айтханда уа, усталыкъ хазырлыгъыны даражасы тийишлисича болгъанлагъа жарайды. Аланы уа тюрлю-тюрлю курсланы къураргъа эмда бардырыргъа эркинликлери болгъан компанияла  бередиле.

Бюгюннгю жашауда аслам зат кечеден тангнга тюрленип къалады дерчады. Бирле онсегиз жыллары толгъунчу окъуна косметологлагъа  ботокс этдирирге келгенлерин Алим асыры тюзге да санамайды. Аланы асламысы не бла кюреширге билмей, безирегенлери себепли келгенлерин айтады.

– Хар неси да тап болуп тургъанлай да, пациентле моданы ызларына талпынып, телевизорда модельледе, «жулдузладамы» дейик, кёргенлерин къатларгъа да  къызынадыла. Алай бла кесибизни сыфатыбызны бузуп къоярбыз  деп да къоркъмайдыла, – дейди.

Эстетикалы медицинагъа адам профилактика жанына эс буруп келгенин а тюзге санайды. Нек дегенде бетни терисини къартайыуу жыйырма беш жылдан сора башланады. Аны  себепли врач адамгъа айтып ангылатыргъа да жууаплыды, ишлей туруп да, аны сыфатын бузмай, таплай сакълап къалыргъа да борчлуду.

Алай эсе да, косметологну иши жаланда терини качествосун тапландырыудан, аны жыйырылгъанын сыйдамлагъандан сора да, ауруулагъа багъыу бла да байламлыды. Аллай, тери ауруула бла  къыйналгъанла уа кёп тюбегенлерин белгилейди Нёгер улу.

Сёз ючюн, розацеа неда акне деген тюрлюлери адамлада аслам халда боладыла. Жарсыугъа, ала бек гитчечикледе, абаданлада да тюбейдиле. Бу тери ауруула бир-бирледе саулай жашауларыны узунлугъуна къалып къалыргъа да боладыла. Аны себепли врач анга келгенлеге жаланда эстетика жаны бла угъай, саулукъландырыу эмда багъыу жаны бла да болушлукъ, себеплик этеди. Нек дегенде косметология – ол эм алгъа профилактикалы медицинады.

Табийгъат кеси адамны сыфатын тап жаратхан эсе, аны  бла бек кёп кюреширге кереклиси болмагъанын да чертеди ушакъ нёгерим. Жаланда аны бетинде бузгъан заты бар эсе, косметологдан болушлукъну ма ол заманда излерге жарарыгъын белгилейди.

– Косметолог врач болгъан къадарымда, адамны ариулугъун аны эринлеринде, гитче бурунчугъунда, ишленнген сакъалында угъай, аны бирсилеге ушамагъан энчилигинде кёреме. Аны бла бирге уа ол кесине къарай билирге да керекди деп сунама. Ишлерге уа, хау, терини тапландырыу бла бегирек сюеме. Нек дегенде оюмум алайды – саулукълу, качестволу терилери болгъан инсанланы жашаулары да анга кёре жетишимли болады, – дейди доктор андан ары.

Ол усталыкъ хазырлыгъыны даражасын ёсдюрюуде, чыгъармачылыкъ жолунда да, нек дегенде косметологияны уа ол чыгъармачылыкъгъа санайды, биреуден болушлукъ излемегенди. Адам жетишимге жаланда кесини билими, къыйыны бла келирине ийнана, бу жоругъуна кёре ишлейди эмда жашайды.

Алгъаракълада «Ногеров-Клиник» деген ат бла эстетика косметологияны арасын ачханды. Косметолог кёпле суннганча тынч жумуш болуп къалмагъанын черте, бу бёлюмде дайым да кесинги усталыгъынгы ёсдюргенлей, жангычылыкълагъа тюшюннгенлей, башха амаллагъа юйреннгенлей, адамны анатомиясын да билгенлей турургъа борчну, жууаплылыкъны да белгилейди.

Ол затланы барысына да тюшюнюп, битеу да тюрлениуледен, жангычылыкъладан хапарлы болгъанлай турур ючюн, бютюнда ол неда бу дарман  бла ишлерге эркинлик алыр ючюн да кёп заман керек болгъанындан сора да, иги кесек ырысхы къоратыргъа тюшгенин да жашырмайды. Бюгюнлюкде болгъан жетишимлери, даражасы ючюн а анасы Маринагъа ыразыды. Элде ёсе, иш юсюнде чыныкъгъаны, окъуугъа кире туруп, артда косметология ызны сайлагъанында бир-бирлеча анга кюлюп къоймай, бютюн кёллендиргени ючюн да.

Ишни эбине кеси тюшюннгенден сора да, аслам уллу компания бла байламлыкъ жюрюте, сынамына кёплени юйретеди, лекцияла окъуйду.

Солургъа заманы да аз къалады Алимни. Аны Москвадан тышында да, бирси шахарлагъа вебинарла, семинарла, тренингле, мастер-классла да бардырыргъа чакъырадыла. Аны билими, сынамы да кёплеге керек  боладыла, жарагъан да этедиле. Ол а, белгилегенибизча, бюгюнлюкде анга къудурет саугъалагъан ишни, ырысхыны да барлыгъы анасыны кёл этдиргенинден башланнганына ийнана, аны ышаныулугъуна кертичилей къала, кесини билимин ёсдюргенлей, жангычылыкълагъа тюшюннгенлей да турады.

Трамланы Зухура.
Поделиться: