Ал уруму – аламат

Нальчикде Къулийланы Къайсын атлы орамда  орналгъан биринчи модель китапханада «Санга китапны саугъаларма» деген акция башланнганды.  Ары келген къонакъланы араларында  КъМР-ни Парламентини  Билим бериу, илму эмда жаш тёлюню ишлери жаны бла  комитетини таматасы Нина Емузова, КъМР-де Адамны эркинликлери жаны бла уполномоченный Зумакъулланы Борис, КъМР-ни жарыкъландырыу эмда  илму  министри Анзор Езаов да болгъандыла.

«Акцияны магъанасы – китапланы жыйып, аланы ёксюз эмда къарар адамлары болмай къалгъан сабийле тургъан юйлени, интернат-школланы китапханаларына  ётдюрюудю», – деп ангылатханды «Биринчилени атламлары» Битеуроссей биригиуню регион бёлюмюню  башчысы Аслан Шипшев.

Китапланы биринчи модель китапханагъа  келтирирге боллукъду. Аланы  жыйыу 14-17 февральда ётерикди. Китапла тап халда болургъа керекдиле, гитчелеге жораланнганла болсала бютюн иги.

Къонакъла олсагъат юлюшлерин къошхандыла: Нина Емузова «Орус халкъ жомакъла», «Гитче патчах», «Къурч къалай къатханды» эмда «Мында эрттенликле шошдула» деген китапланы келтиргенди.

– «Биринчилени атламлары» биригиу къурагъан бу ишге ким да ыразы боллукъду. Мен да бюгюн келтирген китаплада  жюрегиме тюшген, акъылымда  болгъан сагъышларымы туура этгенме. Ол санда  китап  мени къадарымда къаллай магъананы тутханыны юсюнден  да жазгъанма. Бек аламат акцияды. Ахшы жолгъа! – деп чертгенди Нина Емузова.

Анзор Езаов  дагъыстанлы поэт Расул Гамзатовну  «Шуёхларынгы сакъла» деген назму жыйымдыгъын  эмда «Ганс Христиан Андерсенни жомакъларын»   саугъалагъанды.

Зумакъулланы Борис да он китапны бергенди.  «Энди интернет  аслам жер ала барады. Анда къаллай  билдириуню, шартны да табаргъа боллукъду.  Алай китапха жетген жокъду. Алгъын Совет Союзда китапланы кёп окъуй эдиле, ол бек багъалы саугъа болуучу эди. Бу акцияны хайырындан   китапны окъургъа сюйгенле бютюн кёп болурла деп ышанама. Кесими юсюмден айтсам, быллай иш боллукъду деп эшитгенимде, кётюралгъаным чакълы бир китап келтиргенме. Аланы араларында кесим жазгъанла да бардыла», – дегенди ол.

Акцияны сабийлени бла жаш тёлюню «Биринчилени атламлары» Битеуроссей биригиуню регион бёлюмю, КъМР-ни Жаш тёлюню ишлери жаны бла министерствосу эмда  Китапханаланы Нальчикде ара бёлюмю къурагъандыла.

Холаланы Марзият.
Поделиться: